Joshua 13
1 這時，約書亞已經當老。上主對佢講：「你恁老了；總係還有盡闊个所在吂佔領，
2 就係非利士㧯基述个歸隻地區，
3 並南方亞衛人所有个土地。(這垤地南對埃及邊境个西曷河，北到以革倫个邊境，本來屬迦南人，就係住在迦薩、亞實突、亞實基倫、迦特㧯以革倫个非利士五個王所有个。)
4 還有迦南人所有个土地，㧯屬西頓人个米亞拉，直到亞摩利人邊境个亞弗；
5 又有迦巴勒人个土地，黎巴嫩東片所有个土地—對黑門山南片个巴力‧迦得到哈馬隘口。
6 這地區包含住在黎巴嫩山㧯米斯利弗‧瑪音之間山區个西頓人所有个土地。當以色列人進到該位个時，𠊎愛親自將這兜人全部逐出去。你愛照𠊎命令你个話將這垤地抽籤分給以色列人。
7 這下，你愛將這垤地分給其他个九個支族㧯瑪拿西个半支族，做佢等个產業。」
8 呂便支族、迦得支族，㧯瑪拿西个半支族个人已經得到上主个僕人摩西分給佢等、在約旦河東片个土地。
9 佢等个土地對亞嫩山壢堘頭个亞羅珥一直到山壢中央个城，包含米底巴到底本所有个高原；
10 又直到亞捫邊界，包含希實本个亞摩利王西宏所統治个該兜城。
11 這垤土地也包含基列、基述㧯瑪迦、歸隻黑門山，㧯巴珊全地，直到撒迦；
12 又包含最後一個利乏音人、巴珊王噩所統治个國土—亞斯他錄㧯以得來。摩西打贏這兜人，將佢等逐出去。
13 總係以色列人無逐走基述人㧯瑪迦人；佢等直到今晡日還係住在以色列國內。
14 摩西無分土地給利未支族，因為上主識㧯摩西講，佢等愛分到燒獻給上主—以色列上帝个祭物；這就係佢等个產業。
15 摩西分一部份土地給呂便支族該兜家族，做佢等个產業。
16 佢等个地界直到亞嫩山壢堘頭个亞羅珥，㧯山壢中央个城，並米底巴周圍个高原；
17 又包含希實本㧯高原上所有个城，就係底本、巴末‧巴力、伯‧巴力‧勉、
18 雅雜、基底莫、米法押、
19 基列亭、西比瑪、河谷中山岡个細列哈‧沙轄、
20 伯‧批珥、比斯迦山排，㧯伯‧耶西末。
21 佢等个土地也包含高原上所有个城㧯希實本个亞摩利王西宏全部个國土。摩西打贏西宏王，也打贏米甸該兜領袖：以未、利金、蘇珥、戶珥㧯利巴。這兜領袖識為西宏王統治這地區。
22 在以色列人㓾掉个人當中，有比珥个孻仔卜卦个巴蘭。
23 呂便支族个西片係用約旦河做界限。以上這兜城鎮全部分給呂便支族該兜家族，做佢等个產業。
24 摩西分一部份土地給迦得支族該兜家族，做佢等个產業。
25 佢等个地界包含雅謝㧯基列所有个城，㧯亞捫人土地个一半，直到拉巴東片个亞羅珥；
26 又包含對希實本到拉抹‧米斯巴㧯比多寧，對瑪哈念到羅‧底巴个邊界。
27 約旦河谷个部份包含伯‧哈蘭、伯‧寧拉、疏割、㧯撒分，就係希實本王西宏其他个土地，西片个邊界係約旦河，向北直到加利利湖。
28 以上這兜城鎮全部分給迦得支族該兜家族，做佢等个產業。
29 摩西分一部份土地給瑪拿西个半支族該兜家族，做佢等个產業。
30 佢等个地界直到瑪哈念，包含巴珊全地，就係巴珊王噩个全部土地、㧯在巴珊、屬睚珥个六十個村莊。
31 又包含基列个一半，㧯巴珊王噩个兩座大城—亞斯他錄㧯以得來。以上這兜土地全部分給瑪拿西个半支族該兜家族；這半支族係瑪拿西个孻仔瑪吉个後代。
32 以上所記載係摩西在約旦河東片、耶利哥對面、在摩押平原分土地个情形。
33 摩西無分土地給利未支族；佢㧯佢等講，照上主所應許个，上主—以色列个上帝就係佢等分到个產業。