John 12
1 𨃟過節前六日，耶穌到伯大尼，就係拉撒路住个地方(耶穌識在這位喊拉撒路復活)。
2 在該位有人請耶穌食夜；馬大𢯭手招待，拉撒路㧯其他个人客同耶穌共下坐席。
3 這時，馬利亞拿一罐半斤重極寶貴个純哪噠香油，來膏耶穌个腳，又用自家个頭那毛拭；屋肚就充滿香味。
4 耶穌个一個學生，就係愛出賣佢个加略人猶大，講：
5 「樣般毋拿這香油去賣三百隻銀錢來分給窮苦人呢？」
6 (佢講這個話，並毋係正經關心窮苦人，係因為佢係賊仔；佢管錢，常常偷拿公款。)
7 總係耶穌講：「由在姖！這係姖留下來為到𠊎安葬該日用个。
8 窮苦人常常同你等共下，總係𠊎毋係常常同你等共下！」
9 一大群猶太人聽講耶穌在伯大尼，就到佢該位去。佢等毋單淨係為到耶穌去，也係想愛看耶穌喊佢對死返生个拉撒路。
10 所以，該兜祭司長就計謀愛連拉撒路也共下㓾掉，
11 因為盡多猶太人為到佢个緣故離開佢等，去信耶穌。
12 第二日，歸大陣到耶路撒冷過節个人聽講耶穌愛入城。
13 佢等就拿等棕樹枝出去迎接佢，大聲喊講：和散那！頌讚上帝！願上帝賜福給該奉主名來个！願上帝賜福給以色列个王！
14 耶穌尋到一隻細驢仔，騎上去，就像聖經所記載个：
15 鍚安城个子女啊，毋使驚！看啊，你等个君王騎等細驢仔來了！
16 該時，厥學生無了解這事情个意思；到耶穌得到榮光以後，佢等正想到聖經个話就係指佢講个，佢等也正經照所預言个行。
17 耶穌喊拉撒路對死返生、對墳墓出來个時，該兜在場个人繼續將所看到个事傳開來。
18 這就係有恁多人去迎接耶穌个原因，因為佢等聽到佢所行个這神蹟。
19 法利賽人就彼此講：「𠊎等所做个全無效；看啊，全世界攏總跈佢去囉！」
20 節期中，到耶路撒冷做禮拜个人當中，有兜希臘人。
21 佢等來見加利利个伯賽大人腓力，要求佢講：「先生，𠊎等想愛見耶穌。」
22 腓力去㧯安德烈講，兩個人就共下去㧯耶穌講。
23 耶穌應講：「人子得榮耀个時節到了！
24 𠊎實在㧯你等講，一粒麥仔無落在泥肚來死，還係一粒；若係死掉，就會結子多多。
25 惜自家生命个人，會失落生命；甘願犧牲自家在這世間个生命个，佢个生命反轉會保存到永生。
26 愛服事𠊎个人，就愛跈𠊎；𠊎在㖠位，𠊎个僕人也愛在㖠位。服事𠊎个人，吾爸一定會重用佢。
27 「這下，𠊎个心盡愁，𠊎愛講麼介呢？𠊎敢愛求阿爸救𠊎脫離這個時節麼？總係，𠊎就係為這來个，一定愛經歷這苦難个時節。
28 阿爸啊，願你榮光你个名！」當時，有聲音對天頂下來，講：「𠊎已經榮光𠊎个名，還愛再榮光！」
29 企在該位个眾人聽到這個聲，就講：「打雷公囉！」也有兜人講：「係天使㧯佢講話！」
30 耶穌㧯佢等講：「這聲音毋係為到𠊎，係為到你等來个。
31 這下，這世界愛受審判；這下，世間个統治者會被上帝逐走了。
32 𠊎自家被人對地上擎起來个時，會吸引萬人來歸𠊎。」
33 (佢講這個話係指佢自家會樣般死講个。)
34 眾人應講：「𠊎等个法律㧯𠊎等講，基督係永遠長存个；你樣般講人子一定愛被人擎起來？這人子係麼人呢？」
35 耶穌講：「光在你等當中个時間無幾久了；你等愛趕還有光个時繼續行，免得烏暗逐到你等，因為在烏暗中行个人毋知佢會去到㖠位。
36 趕你等還有光个時愛信這光，好俾你等成做光明个人。」講了這兜話，耶穌就離開佢等，囥起來。
37 佢雖然在佢等面前識行盡多神蹟，佢等還係毋信佢。
38 這係愛應驗先知以賽亞識講个話：主啊，有麼人信𠊎等所傳个道理呢？主个權能對麼人顯明呢？
39 所以佢等無法信；因為以賽亞也識講：
40 上帝使佢等青盲，使佢等硬心，免得佢等个目珠看得到，佢等个心明白。所以上帝講：佢等毋會轉向𠊎，來俾𠊎醫好佢等。
41 以賽亞講這兜話係因為佢看到耶穌个榮光，指佢來講个。
42 雖然恁樣，猶太人个領袖中也有好多信耶穌个，總係因為驚法利賽人，毋敢公開承認，免得被人逐出會堂。
43 佢等愛得到人个稱讚，贏過愛得到上帝个稱讚。
44 耶穌大聲喊講：「信𠊎个，毋單淨係信𠊎，也係信該『差𠊎來个』。
45 看到𠊎，也係看到該『差𠊎來个』。
46 𠊎做光，來到世間，係愛使所有信𠊎个人毋會住在烏暗中。
47 該聽𠊎个話、毋遵守个人，𠊎毋會審判佢。𠊎來个目的毋係愛審判世間人，係愛拯救佢等。
48 拒絕𠊎、毋接受吾話个人，自有審判佢个；在末日，𠊎所講个道理會審判佢！
49 因為𠊎毋係靠自家个權柄來講，反轉係差𠊎來个阿爸命令𠊎講麼介，傳麼介。
50 𠊎知佢个命令會帶來永遠个生命。所以，𠊎所講个就係照阿爸㧯𠊎講个。」