John 11
1 有一個病人，名安到拉撒路，住在伯大尼；馬利亞㧯姖个阿姊馬大也住在這村莊。
2 (這馬利亞就係用香油膏主个腳，又用自家个頭那毛拭燥个。發病个拉撒路就係厥老弟。)
3 該兩姊妹喊人去見耶穌，講：「主啊，你所惜个朋友發病了。」
4 耶穌聽到這消息就講：「拉撒路毋會因為這個病來死；這件事發生係愛榮光上帝，使上帝个孻仔得到榮光。」
5 耶穌盡惜馬大㧯厥老妹，並拉撒路。
6 佢聽到拉撒路發病个消息後，又在所住个地方停兩日。
7 然後佢正㧯學生講：「𠊎等倒轉去猶太。」
8 厥學生講：「先生，前無幾久，猶太人愛拿石頭㧹你，你還想愛再去該位嗎？」
9 耶穌講：「日時頭毋係有十二點鐘嗎？人在日時頭行路就毋會跌倒，因為佢看得到這世間个光。
10 人在暗晡頭行路就會跌倒，因為佢無光。」
11 耶穌講這兜話以後，又講：「𠊎等个朋友拉撒路睡掉了；𠊎愛去喊佢䟘起來。」
12 學生講：「主啊，佢若係睡掉，就會好起來。」
13 其實，耶穌个意思係講拉撒路已經死掉；佢等恅到佢係講平常个睡目。
14 所以耶穌明明㧯佢等講：「拉撒路已經死掉；
15 為到你等个緣故，好在𠊎無在該位，恁樣你等就會信。這下，𠊎等來去佢該位。」
16 多馬(偏名雙生仔)對其他个學生講：「𠊎等共下來去，好同先生共下死！」
17 耶穌到伯大尼，就知拉撒路已經在四日前埋掉。
18 伯大尼離開耶路撒冷將近三公里遠；
19 有好多猶太人來看馬大㧯馬利亞，為到姖等老弟个死來安慰姖等。
20 馬大聽到耶穌會到了，就出去迎接佢；總係馬利亞留在屋肚坐等。
21 馬大對耶穌講：「主啊，你若係在這位，吾老弟就毋會死！
22 總係𠊎知，就係這下，無論你對上帝求麼介，佢也會賜給你。」
23 耶穌㧯姖講：「若老弟一定會復活。」
24 馬大講：「𠊎知，在末日復活个時節，佢會復活。」
25 耶穌講：「𠊎就係復活，就係生命。信𠊎个人，雖然死掉，一定會生過來；
26 生前信𠊎个人一定永遠毋會死。你相信這兜話麼？」
27 馬大講：「主啊，𠊎信！𠊎信你就係該愛來世間个基督，上帝个孻仔。」
28 馬大講了這個話，就轉去屋下，細聲㧯厥老妹馬利亞講：「先生來了，佢喊你。」
29 馬利亞聽到這個話，即時就䟘起來，去見耶穌。
30 (該時，耶穌還吂入村莊，還在馬大迎接佢个地方。)
31 該兜到屋下來安慰馬利亞个猶太人，看到姖趕緊䟘起來出去，就跈等姖，恅到姖愛去墳墓該位噭。
32 馬利亞來到耶穌該位，一看到佢，就伏在厥腳前，講：「主啊，你若係在這位，吾老弟就毋會死！」
33 耶穌看到馬利亞噭，又看到跈姖共下來个猶太人也噭，心中非常悲傷，強強會忍毋住，
34 就問佢等講：「你等將佢葬在㖠位？」佢等講：「主啊，請你來看。」
35 耶穌噭出來。
36 所以猶太人講：「你看，佢還惜這個人噢！」
37 總係有兜人講：「佢既然醫好瞙目个目珠，敢無法度使拉撒路莫死嗎？」
38 耶穌心中又非常悲傷。佢來到墳墓前；該墓係一隻山窿，入口有一垤大石頭塞等。
39 耶穌吩咐講：「將石頭徙開！」死人个阿姊馬大講：「主啊，佢已經埋掉四日，身屍都臭掉了！」
40 耶穌㧯姖講：「𠊎毋係識㧯你講，你若係信，就會看到上帝个榮光嗎？」
41 佢等就將石頭徙開。耶穌昂頭望天，講：「阿爸啊，𠊎感謝你，因為你已經聽𠊎。
42 𠊎知你時常聽𠊎；總係𠊎講這個話係為到塍頭這兜人，愛使佢等信係你差𠊎來个。」
43 講了，耶穌就大聲喊講：「拉撒路，出來！」
44 該死人就出來；厥手腳纏等布條，面包等布仔。耶穌吩咐佢等講：「解開，俾佢行！」
45 盡多來看馬利亞个猶太人看到耶穌所做个事，就信佢。
46 總係也有兜人去見法利賽人，將耶穌所做个事對佢等報告。
47 所以，法利賽人㧯該兜祭司長召開議會，在會中講：「這個人行恁多神蹟，𠊎等愛樣般正好呢？
48 假使𠊎等由在佢㩢下去，大家都會信佢，羅馬人就會來毀滅𠊎等个聖殿㧯民族！」
49 佢等當中有一個人，名安到該亞法，係該年做大祭司个。佢講：「你等樣會恁戇！
50 一個人代全國个人死，免得全民族受消滅，這敢毋係對你等最有利益个事嗎？」
51 其實，這個話毋係佢自家个意思；總係，身為當年个大祭司，佢係在預言耶穌愛代猶太人死，
52 毋單淨代佢等死，也愛將散在各地方上帝个子女召集共下，合做一群。
53 對該時開始，猶太人个領袖就計劃愛殺害耶穌。
54 因為恁樣，耶穌無愛在猶太地區公開行動。佢到曠野附近一個安到以法蓮个村莊去，在該位同學生共下住。
55 猶太人个𨃟過節會到了。節期以前，盡多人對鄉下上耶路撒冷去，愛在該位守潔淨禮。
56 佢等就緊尋耶穌；佢等聚集在聖殿个時，彼此問講：「你等認為樣般，佢敢毋會來過節嗎？」
57 該時，祭司長㧯法利賽人早已經下命令講：假使有人知耶穌在㖠位，一定愛報告，好俾佢等去捉佢。