Bible

1 人在世間，就像做兵揹重擔，日日過像工人勞苦个生活， 2 像奴才渴慕日頭落山，像請个工人等發工錢。 3 𠊎註定過困苦个日月；逐暗晡只有憂愁痛苦。 4 𠊎橫落去睡目，感覺暗晡時樣會恁長，翻過來翻過去，一直到天光睡毋落覺。 5 𠊎歸身生蟲、訌膿；皮肉收口又爛掉。 6 𠊎个日仔比梭較遽，全部在失望中過掉。 7 上帝啊，求你記得，𠊎个生命就賸到一口氣；𠊎毋會再看到幸福个日仔。 8 你這下看等𠊎，無幾久會看𠊎毋到；若係想愛尋𠊎，該時𠊎已經無在了。 9 像雲散掉一樣，人一死就毋會倒轉來； 10 佢毋會再轉到厥屋下，故鄉个人也毋記得佢。 11 因為恁樣，𠊎無愛再恬恬！𠊎愛講出𠊎心靈个憂愁；𠊎愛道嘆𠊎內心个痛苦。 12 上帝啊，你做麼介監視𠊎？敢講你將𠊎準做海怪嗎？ 13 𠊎上眠床想歇睏一下，希望會減輕𠊎个痛苦； 14 你卻用惡夢來使𠊎著驚，用得人驚个異象來嚇𠊎。 15 所以，𠊎甘願哽死，較贏留等一身骨頭。 16 𠊎當想愛死，𠊎个生命無半點生趣；求你莫插𠊎，𠊎个人生完全無意義。 17 人算麼介，你恁看重佢？你樣會將佢放在心上？ 18 你逐朝晨鑒察佢，時時刻刻考驗佢。 19 你愛到幾時正肯放過𠊎，俾𠊎吞一下口潾好麼？ 20 鑒察人个主啊，敢講𠊎个罪礙到你係麼？做麼介將𠊎準箭靶來射？𠊎成做你恁大个重擔嗎？ 21 你樣毋赦免𠊎个過失？你樣毋除掉𠊎个罪惡？𠊎無幾久就會入墳墓；你尋𠊎，𠊎已經無在了。