Job 40
1 上主繼續㧯約伯講：
2 好拗个約伯啊，你愛㧯全能者理論；你敢㧯𠊎辯駁，這下你做得應𠊎啊。
3 約伯回答上主講：
4 𠊎算麼介？還愛樣般應你呢？𠊎揞等嘴，毋敢再講了。
5 講一擺就罅了；𠊎無愛加講了。
6 所以，上主對大風當中㧯約伯講：
7 企起來，像一個勇敢个人；𠊎問你，你來指教𠊎。
8 你想愛證明𠊎無公當、定𠊎有罪，來顯出自家正著係麼？
9 你有像𠊎恁大个能力麼？你會發出打雷公个聲麼？
10 你若係會，就去用尊貴㧯莊嚴來打扮，用尊嚴㧯光榮做衫褲。
11 你看該兜驕傲个人；你去大發譴，㩢衰佢等啊！
12 你去將你所看到該兜驕傲个人拉下來；將做壞事个人踐踏在佢等个本地。
13 去將佢等全部埋葬；將佢等捆在陰間啊！
14 若係恁樣，𠊎就會讚美你，承認你自家有能力得到勝利。
15 看該恁大个河馬啊；𠊎造牠，也造你。牠像牛恁樣食草；
16 牠个氣力在當紮个腰間！牠个能力在結實个肚笥！
17 牠个尾翹起來像香柏樹；牠大腳髀个肉樣般勇健！
18 牠个骨頭像銅管；牠个腳像鐵棍仔。
19 𠊎所創造个百獸中牠盡特別；只有牠个創造者正能打贏牠。
20 在野獸活動个山林中，有生當多牠愛食个草。
21 牠睡在蓮花葉下背，伏在蘆竹㧯湳泥肚。
22 蓮花个葉做得㧯牠遮涼，河壩滣个柳樹也圍等牠。
23 河壩做大水个時，牠毋會緊張；約旦河个水漲到牠个嘴唇，牠也安然自在。
24 麼人能去揞牠个目珠捉牠？麼人能用鉤仔牶牠个鼻孔？