Job 34
1 以利戶繼續講：
2 你等有智慧个人請聽𠊎个話；你等有智識个人注意聽𠊎講。
3 耳公愛分別話語个內容，就像舌乸試食物个滋味。
4 是非愛𫣆等自家來判斷；善惡也愛𫣆自家來決定。
5 約伯識講：「𠊎無罪，總係上帝無用公當對待𠊎。
6 雖然𠊎正直有理，卻算做講花撩！𠊎無罪，總係受到个傷害無好醫。」
7 你等看過像約伯這種人麼？佢嘲謔上帝，像食水恁隨便。
8 佢盡歡喜㧯壞人來往；佢㧯做壞事个人共下。
9 佢講：「做俾上帝歡喜，這敢有麼介利益呢？」
10 你等明理个人，愛聽𠊎講：上帝絕對毋會做壞事！全能者絕對毋會不義！
11 佢照人个行為報應人，照人所應得个對待人。
12 正經，上帝絕對毋會做壞事；全能者絕對毋會顛倒是非。
13 上帝敢有對麼人領受權力？敢有麼人設立佢管理世界？
14 若係上帝決心收轉生命，若係佢收回氣息，
15 所有血氣个全部會消滅，世間人攏總會變轉泥粉。
16 你若係明理，請聽𠊎講，請注意聽𠊎所講个話。
17 上帝掌權，絕對無可能怨恨公平！佢有公義、權能，你愛定佢有罪嗎？
18 上帝做得對君王講：你無下落！佢也做得對貴族講：你係壞人！
19 佢毋會顛倒是非、對統治者偏心，也毋會巴結有錢人、藐視窮苦人；因為人類全部係佢親手所造个。
20 人可能在暗晡頭忽然間死掉。上帝一攻擊，就將佢等消滅掉；佢毋使出手，就除掉最強个人。
21 佢注意人所行个道路；佢鑒察逐儕人个腳步。
22 就算係烏暗㧯死个陰影，也無法度將罪人囥起來。
23 上帝毋使㧯人定日仔，喊人到佢面前受審判。
24 佢毋使調查就除掉強人，佢設立別人來代理佢等。
25 佢早就注意佢等个行為，一暗晡將佢等推翻消滅。
26 佢在眾人面前鞭打佢等，係為到佢等所做个壞事，
27 因為佢等毋順從佢，藐視佢一切个命令。
28 窮苦人被佢等迫到去求上帝；上帝有聽到佢等求喊个哀聲。
29 無論係國家抑係人民，上帝若係恬恬，麼人做得怪怨佢呢？若係佢揞面毋插，麼人能得到幫助？
30 佢使無敬虔个人無法度做王，免得人民受到災難。
31 樣有人對上帝講：「𠊎已經受到責罰，毋會再過犯罪了。
32 𠊎無看到个，你㧯𠊎講啊；就算𠊎有罪，毋會再犯了。」
33 你既然反對上帝个作為，佢敢愛照你个要求施行報應？愛做決定个係你，毋係𠊎；將你个想法㧯𠊎等講啊！
34 所有明理个人會同意𠊎个話；所有智慧个人聽到一定會講：
35 「約伯講話無智識；佢个話全無意義。」
36 願約伯徹底受到試驗，因為佢回答當像壞人。
37 佢毋單淨犯罪，事後還繼續悖逆；佢在大家面前加講話侮辱上帝。