Job 33
1 約伯啊，這下請聽𠊎个話；注意聽𠊎所愛講个一切。
2 𠊎這下開嘴，用舌乸講話。
3 𠊎愛講出真心話；𠊎講个係誠實話。
4 𠊎係上帝个靈創造个；全能者个氣給𠊎生命。
5 你若係有話愛講，做你提出來反駁。
6 𠊎在上帝面前㧯你共樣；𠊎乜係用泥造个。
7 所以你毋使驚𠊎；𠊎毋會給你壓力。
8 你講个這兜話，𠊎親耳聽到了。
9 你講：「𠊎無罪，無做麼介毋著；𠊎清白，無犯麼介罪孽。
10 總係，上帝尋機會打擊𠊎，將𠊎看做仇敵。
11 佢用鐵鍊鎖等𠊎个雙腳；佢注意看𠊎所有个行踏。」
12 總係約伯啊，𠊎㧯你講，你毋著了；無論麼介人，上帝比佢還較偉大。
13 你做麼介怪怨上帝，講佢毋應你个申訴？
14 上帝一直用各種方法講話，總係無人注意聽佢講麼介。
15 暗晡頭人當好睡个時節，上帝託夢在異象中講話。
16 佢打開人个耳公，用警告來嚇佢等。
17 上帝講話，喊人離開罪惡，使佢等毋會自高自大。
18 佢毋願看到佢等落陰間；佢愛拯救佢等脫離死亡。
19 上帝用病痛來責罰人个過失，俾人病到睡在眠床，來管教佢。
20 發病个人麼介都毋想食，連盡好食个也全無胃口。
21 佢瘦夾夾、無半點肉，厥骨頭全部突出來。
22 佢个靈魂接近陰府；佢个生命離死無遠。
23 上帝个千萬天使當中，或者有一位傳話个，來指示人應該盡个本份。
24 天使憐憫佢，講：「放佢走！佢毋使落去死个深坑；𠊎有錢贖轉佢个自由。」
25 佢个身體會恢復到像細人仔；佢會變到像後生个時恁勇健。
26 佢祈禱，上帝就會歡喜應佢；佢愛用快樂个心敬拜上帝；上帝愛㧯佢恢復好个關係。
27 佢會公開承認：「𠊎有犯罪，顛倒是非；總係上帝並無照𠊎个罪來責罰𠊎。
28 佢救𠊎，使𠊎毋使落死个深坑；使𠊎个生命還做得看到光明。」
29 上帝一擺又一擺，為人做這一切事，
30 愛救人離開死个深坑，使佢享受生命个光明。
31 這下，約伯啊，你愛聽𠊎个話，你愛恬恬，好好聽𠊎講話。
32 你若係有話愛講，就做得應𠊎；你盡量講，𠊎願意將你當做有理个。
33 若係你毋講，就恬恬聽；𠊎愛將智慧教導你。