Job 30
1 總係這下，比𠊎較後生个人卻嘲謔𠊎；佢等个阿爸本來係𠊎盡看毋上眼个人，連俾佢等㧯狗仔共下去掌羊，𠊎都無愛。
2 佢等盡衰弱，雙手無力；佢等對𠊎無麼介用。
3 佢等因為貧窮飢餓，身體瘦弱，暗晡頭在偏僻个地方挖草根充飢。
4 佢等在草藪中尋鹹草葉，連苦澀个羅騰樹根也拿來做食物。
5 佢等被人趕出；人喊佢等像捉賊仔恁樣。
6 高不將，佢等走到山壢肚，住在石窿㧯地窿个底背。
7 佢等在荒埔像野獸噦噦嘶嘶，在竻藪个下背尖做一堆。
8 佢等係下賤个廢物，被人鞭打，逐出境外。
9 這下，這兜人唱歌來嘲謔𠊎；𠊎變做佢等个笑談。
10 佢等惱𠊎，閃到遠遠；看到𠊎就呸𠊎口潾。
11 上帝使𠊎衰弱無力，佢等就放勢侮辱𠊎。
12 這群下流个人走到右片攻擊𠊎；佢等使𠊎逃走；佢等準備對𠊎做最後个攻擊。
13 佢等切斷𠊎个退路，想盡辦法愛消滅𠊎；無一個人阻擋佢等。
14 佢等攻破𠊎个防備，重重磧在𠊎个身上。
15 恐怖像城牆揜到𠊎，𠊎个榮光隨風飛走，富貴像雲恁樣消散。
16 這下𠊎差毋多會無命；痛苦个日仔將𠊎捉住。
17 暗晡頭𠊎全身骨頭痠痛，大痛苦咬等𠊎一直無停。
18 上帝用大力將𠊎个衫領仔拉到𢫮𢫮，又扭等𠊎个衫。
19 佢將𠊎㧒在泥漿底背；𠊎像泥粉㧯火灰一樣。
20 上帝啊，𠊎求你，你毋應；𠊎向你祈禱，你毋插𠊎。
21 你對𠊎變心，對𠊎恁殘忍；你用大能个手來壓迫𠊎。
22 你用風差將𠊎打來打去，俾𠊎在暴風中㧹來㧹去。
23 𠊎知你想愛俾𠊎下去陰間，𢱋𠊎到人死掉愛去个所在。
24 你做麼介攻擊一個衰敗个人呢？堵到災難，佢只有向你求憐憫。
25 敢講𠊎無㧯堵到災難个人共下噭？敢講𠊎毋識為到窮苦个人憂愁過？
26 𠊎盼望蒙福反轉受到災禍；𠊎期待光明反轉堵到烏暗。
27 𠊎因為困苦愁煩心肝當痛；災難一日過一日毋識停過。
28 𠊎在烏暗中來行，看毋到光明；𠊎企在會眾面前迫切求幫助。
29 𠊎个聲音像野狗吠；也像鴕鳥噭个聲音。
30 𠊎个皮膚變烏烏、𢫫掉；𠊎發燒到骨頭像𤏸火。
31 𠊎彈琴也無喜樂，歕簫仔乜出噭聲。