Job 10
1 𠊎盡惱自家个生命。𠊎愛講出𠊎个哀怨；𠊎愛將內心个痛苦全部拚出來。
2 上帝啊，毋好定𠊎有罪；㧯𠊎講，你愛告𠊎麼介？
3 親手所創造个，你壓制又看輕，壞人所計謀个，你笑瞇瞇贊成。你恁樣做敢有合理？
4 你个看法㧯人个看法共樣係麼？
5 敢講你个壽命㧯人个壽命平長？
6 恁樣，你做麼介查𠊎个罪？你做麼介尋𠊎个過失？
7 你明明知𠊎無罪；你知無人能救𠊎脫離你个手。
8 你親手創造𠊎、使𠊎有人形；這下轉過來，愛親手毀滅𠊎。
9 求你毋好毋記得你係用泥造𠊎；你這下又愛使𠊎歸轉塵土係麼？
10 你毋係將𠊎像乳倒出來，使𠊎像乳酪凝結成胎嗎？
11 你用筋骨將𠊎全身連結起來；你又用肉㧯皮包等𠊎个筋骨。
12 你賜給𠊎生命㧯慈愛；你看顧保全𠊎个心靈。
13 這下𠊎正知你个心意；你早就打算愛傷害𠊎。
14 你注意𠊎係毋係有犯罪；若係有罪，你毋肯赦免𠊎。
15 𠊎一下犯罪，黏時就受責罰，無犯罪，頭那也毋敢擎起來；因為𠊎滿心見笑，食盡苦難。
16 𠊎當得意，你就像獅仔愛捉𠊎；你甚至還係用神蹟來傷害𠊎。
17 你總係有打擊𠊎个證據；你對𠊎个受氣有加無減，像派軍隊輪等來攻擊𠊎。
18 上帝啊，你做麼介俾𠊎出母胎呢？人吂看到𠊎以前，樣毋俾𠊎斷氣？
19 𠊎一出母胎就被人送去墳墓，就像無出世，恁樣敢毋會較好？
20 𠊎个一生敢毋係愛結束了？放𠊎過哪！求你俾𠊎在賸到个日仔有一些安樂。
21 𠊎愛走了，無可能倒轉來；𠊎愛去死蔭烏暗个所在。
22 該片只有烏暗、死蔭、無秩序；在該位，連光也還係暗疏疏。