Isaiah 9
1 總係該受過苦難个人，毋會再看到烏暗了。以前西布倫㧯拿弗他利兩支族所住个地方識被人看輕；總係將來這地區，就係對地中海直到約旦河東片，包含外族人住个加利利，全部會得到光榮。
2 生活在烏暗中个人，已經看到大光；住在死蔭之地个人，這下有光照佢等。
3 上主啊，你賜給佢等極大个喜樂；你增加佢等个歡喜。佢等在你面前就像人收成農作物恁歡喜，又像人分享戰利品恁快樂。
4 因為你已經除掉佢等个重軛，扭斷打佢等个皮鞭，拗斷欺負佢等用个棍仔，就像你以前打贏米甸軍隊共樣。
5 侵略者著个鞋，膏當多血跡个衫，全部愛燒掉，像柴恁樣燒掉。
6 有一個孲𤘅仔為𠊎等出世！有一個孻仔賜給𠊎等！佢來係愛統治𠊎等。佢个名安到：「奇妙个導師」，「全能个上帝」，「永遠个阿爸」，「和平个君王」。
7 佢个主權會繼續增長；佢个王國永享和平。佢愛承接大衛个王位；佢愛用公平㧯正義來做統治个基礎，對這下直到永遠。上主—萬軍个元帥愛熱心成就這事。
8 主已經對以色列—就係雅各个子孫宣判。
9 全以色列人民，包含所有住在撒馬利亞个人，全部愛知上帝恁樣宣判了。佢等个心當驕傲，自誇講：
10 「磚屋橫掉，𠊎等來起石屋；桑仔樹做个大樑斷掉，𠊎等來換最好个香柏樹。」
11 所以，上主發動佢等个敵人來攻擊佢等。
12 敘利亞人在東片，非利士人在西片；全部打開嘴想愛吞以色列。雖然恁樣，上主个受氣還吂煞；佢還係愛擎手打佢等。
13 雖然上主—萬軍个元帥責罰以色列人民，佢等還係毋肯悔改，毋肯轉到上主面前。
14 上主愛在一日當中責罰以色列个領袖㧯人民；佢愛將佢等个頭㧯尾全部剁掉。
15 較多歲、有名聲个人就係頭，講花撩教人个先知就係尾。
16 原來應該領導人民个反轉將人民帶入差路，害佢等受迷惑。
17 所以，主絕對毋會放過佢等个後生人，也毋會憐憫佢等个寡婦㧯孤兒；因為所有个人無敬畏上主，無論做事抑係講話攏總像戇仔共樣。雖然恁樣，上主个受氣還吂煞；佢還係愛擎手打佢等。
18 人民个邪惡就像火燒竻仔㧯蒺藜，又遰到樹林，大火𤏸到當猛，捲起一團一團个烏煙，衝等上天。
19 因為上主—萬軍个元帥大發譴，佢个責罰像火，全地燒起來，人民成做柴緊燒等去；無人會憐憫兄弟。
20 在國內个逐所在，人尋來尋去，搶東西食，還係食毋飽；逐儕會食自家个鄰舍。
21 瑪拿西人㧯以法蓮人互相攻擊，佢等又聯合起來攻擊猶大。雖然恁樣，上主个受氣還吂煞；佢還係愛擎手打佢等。