Isaiah 10
1 你等慘了！你等制定無公平个法律㧯假審判來欺負𠊎个子民。
2 你等用這方法剝削窮人个權利，使佢等得毋到公平；你等用這方法侵佔寡婦㧯孤兒个產業。
3 上帝責罰你等个時，你等愛樣般正好呢？佢通過遠方个國家帶給你等災難个時，你等愛樣般正好呢？你等愛到㖠位去求幫助？你等个財產愛囥在㖠位？
4 你等若毋係死在戰場就會被人捉走。雖然恁樣，上主个受氣還吂煞；佢還係愛擎手打你等。
5 上主講：「𠊎用亞述做棍仔來打該兜惹𠊎發譴个人。
6 𠊎派亞述去攻擊無敬畏上帝个國家㧯惹𠊎發譴个人民。𠊎派佢等去搶劫、去捉人，去踐踏該兜人民，像蹂路項个泥糜。」
7 總係亞述皇帝有佢自家个打算。佢決心愛消滅盡多國家。
8 佢誇口講：「𠊎逐個元帥都做得做一國个君王！
9 𠊎征服迦勒挪㧯迦基米施个城。𠊎征服哈馬㧯亞珥拔个城。𠊎也征服撒馬利亞㧯大馬士革。
10 𠊎伸手責罰該兜國家，因為佢等拜偶像；該兜國家个偶像比耶路撒冷㧯撒馬利亞个還較多。
11 𠊎消滅撒馬利亞㧯該位个偶像，也愛照樣消滅耶路撒冷㧯該位个偶像。」
12 總係主講：「𠊎在錫安山㧯耶路撒冷个工作完成以後，𠊎愛責罰亞述皇帝个自大㧯驕傲。」
13 亞述皇帝誇口講：「這全部係𠊎一儕个成就。𠊎恁強大，恁精明能幹！𠊎廢掉這兜國家个國界，也將它兜所有个財富搶淨淨。𠊎像強壯个牛恁樣踐踏該兜地方个人民。
14 𠊎个手將所有國家个財富拿走，像在鳥藪肚拈卵恁容易。無一個翼胛敢對𠊎震動；無一張嘴敢出聲。」
15 總係上主講：「斧頭會比使斧頭个較偉大嗎？鋸仔會比用鋸仔个較重要嗎？敢講棍仔會拿起該拿棍仔个？敢講杖仔會擎起該毋係用樹仔做个？」
16 所以，至高个上主—萬軍个元帥愛用病痛來責罰該兜飽足个勇士，使肥肥个人變到瘦夾夾。在佢等个身體底背會有猛猛个火一直緊燒。
17 以色列个光會成做火；以色列神聖个上帝愛成做火焰。在一日當中，佢愛將所有个燒淨淨，連竻仔㧯蒺藜也燒掉。
18 亞述當靚个樹林㧯盡肥个田地，全部會徹底被上主毀滅，就像一個發病个人漸漸衰弱到死。
19 樹林中賸到个樹仔會無幾多，連細人仔也能算得出。
20 大災難後，還生个以色列人轉來个時，佢等毋會再去倚靠將佢等毀滅个國家；佢等會誠心誠意信靠上主—以色列神聖个上帝。
21 賸到个以色列人，就係雅各个後代所賸下來个，會轉到大能个上帝該位。
22 雖然以色列人像海滣个沙仔恁多，只有賸到个人正能倒轉來。人民定著會受消滅，應得个報應會像大水浸死佢等。
23 至高个上主—萬軍个元帥決定愛毀滅全國。
24 至高个上主—萬軍个元帥對錫安个人民恁樣講：「雖然亞述人識像埃及人恁樣迫害你等，攻打你等，你等毋使驚佢等。
25 無幾久後，等𠊎對你等个受氣消掉，𠊎就向佢等發譴，消滅佢等。
26 𠊎—上主、萬軍个元帥愛用皮鞭打佢等，像以前在俄立巖石該位打米甸人共樣；𠊎愛責罰亞述人，像以前在紅海伸出柺棍仔責罰埃及人共樣。
27 在該日，𠊎愛對亞述个強權下將你等解救出來；佢等个軛毋會再成做你等肩頭頂个重擔。」
28 仇敵攻下艾城！佢等經過米磯崙；佢等將補給品放在密抹！
29 佢等已經通過山壢，在迦巴安營。拉瑪城个人盡著驚；掃羅王故鄉个基比亞人全部逃走了。
30 迦琳人啊，你等大聲喊啊！萊煞人啊，你等愛注意聽！可憐个亞拿突人啊，你等愛應聲啊！
31 瑪得米那人逃走，基柄人全部走去囥命。
32 今晡日敵人在挪伯安營；佢等擎起拳頭乸愛打錫安山㧯耶路撒冷。
33 看啊，至高个上主—萬軍个元帥愛攻擊佢等，用得人驚个大能將佢等當中最驕傲最強大个，全部愛斬下來，像人將樹桍剁下來共樣。
34 上主愛將佢等斬淨淨，像人用斧頭將大樹林斬掉，連黎巴嫩个大樹也全部斬橫下來！