Isaiah 60
1 耶路撒冷啊，䟘起來，像日頭發光；因為上主个榮光出現照等你了！
2 看啊，烏暗遮等大地；大烏暗遮蓋萬民。總係上主愛出現來照你了；佢个榮光愛顯現在你身上。
3 萬國愛來接近你个光；萬王愛來就近你發出个光。
4 頭那擎起來看你周圍發生麼介事！大家集合，愛轉到你這位來。你个孻仔會對遠遠个所在轉來；你个妹仔會像孲𤘅仔被人揇轉來。
5 該時你看到這一切會滿面歡喜，你个心會搏搏跳。會有豐富个財寶對大海該片帶入來；萬國个財富會入到你手中。
6 在你个土地上，歸大陣對米甸㧯以法來个駱駝滿遍係；牠兜會帶等示巴个黃金㧯乳香來。人民會來頌讚上主个作為。
7 基達个羊群全部被人帶到你面前，尼拜約个羊牯全部愛做牲儀，獻在祭壇頂，使上主歡喜。上主愛榮光佢榮耀个聖殿。
8 該兜像雲飛等來，又像月鴿仔飛轉藪个，係麼介？
9 它兜係對遠遠个海島轉來个大船仔，對他施轉來个船仔在最頭前行。它兜將上帝个子民㧯金銀帶等轉來，愛榮耀上主—以色列神聖个上帝；因為佢已經榮耀你了。
10 上主對耶路撒冷講：外族人會來為你起城牆；佢等个國王會來服事你。𠊎識發譴責罰你，總係這下𠊎愛施恩憐憫你。
11 你个城門愛日夜打開開，好俾列國个君王將財寶帶入來給你。
12 毋服事你个民族㧯國家全部愛滅亡；該兜國家會荒廢。
13 黎巴嫩个名產，最好个松樹、柏樹、黃楊樹，全部愛運來，將𠊎个聖殿裝璜到盡靚，使𠊎踏腳个所在富麗堂皇。
14 識欺負你个人，佢等个子孫會向你行禮；所有藐視過你个人，也全部會跪拜你。佢等會稱你做「上主个城」，稱你做「以色列神聖上帝个鍚安城」。
15 你毋會再被人㧒掉、被人惱，毋會再無人經過。𠊎愛使你變做永遠个榮華，成做萬代个喜樂。
16 萬國會歡喜照顧你，列王會來養育你。該時你就會知𠊎係拯救你个上主；𠊎係你个救贖主，係雅各大能个上帝。
17 𠊎愛拿黃金準銅，銀準鐵，銅準樹料，鐵準石頭。𠊎愛使你等个官長用和平來管理，你等个領袖用正義來治理。
18 你國內毋會再聽到強暴个事；你个境內毋會再受到毀滅。你定著會講，你个城牆代表上主个拯救，你个城門象徵上帝應當受讚美。
19 日時頭，你無需要日頭做你个光；暗晡時，你無需要月光發光照你。𠊎—你个上主係你永遠个光；𠊎—你个上帝愛做你个榮光。
20 你个日頭永遠毋會落山，你个月光永遠毋會缺掉；𠊎—你个上主愛做你永遠个光；你悲傷个日仔會結束。
21 你个人民全部會做義人；佢等會永遠承受這地。佢等係𠊎親手種个嫩芽，係𠊎親手做个作品，為到愛顯明𠊎个榮光。
22 你等最細个家庭會成做大族，最弱个家族會成做強國。𠊎係上主；在時機成熟个時，𠊎愛使這事遽遽實現。