Bible

1 上帝講：眾海島啊，愛恬恬，來聽𠊎个話！萬民啊，你等愛重新得到力量！攏總行兼來講話；𠊎等共下來辯論是非。 2 麼人對東方興起一個人，使佢全無失敗？麼人使佢打贏盡多國家、盡多君王？佢个刀㓾人，剁到像泥粉；佢个箭射人，使佢等像風吹禾稈。 3 佢逐佢等，進行非常順利；佢走起來像兩腳無貼地！ 4 麼人使這事發生？麼人決定歷史个方向？係𠊎—上主對開始就在該位，結束个時，𠊎也在該位！ 5 眾海島看到就著驚；地極个人也全部驚到愊愊掣。佢等全部行兼來。 6 佢等互相幫助，鼓勵自家个兄弟講：「愛較好膽兜仔！」 7 木匠鼓勵打金師傅講：「還係你个手藝較幼！」造偶像个師傅緊奢釘釘仔个木匠講：「你做到當好！」佢等用釘仔將偶像固定好，使它毋會搖動。 8 總係，以色列—𠊎个僕人啊，雅各—𠊎所揀選个子民啊，你係𠊎个朋友亞伯拉罕个子孫。 9 𠊎對天涯海角將你帶來；𠊎對遠遠个所在喊你。𠊎對你講：你係𠊎个僕人。𠊎揀選你，𠊎就毋會㧒掉你。 10 毋使驚，𠊎㧯你同在；𠊎係你个上帝，你還驚麼介呢？𠊎愛使你堅強，幫助你；𠊎愛用公義㧯大能來扶持你。 11 該兜對你發譴个人會澇潰、堵到見笑；欺負你个人會消滅、毋見掉。 12 你去尋㧯你相㓾个人，總係尋毋到；你个敵人全部會消滅了。 13 因為𠊎—上主你个上帝，愛賜給你力量。𠊎㧯你講：毋使驚，𠊎一定幫助你。 14 上主講：以色列—𠊎个子民啊，雅各个後代啊，你雖然像蟲仔恁弱小，也毋使驚！𠊎係救贖主—以色列神聖个上帝；𠊎愛幫助你。 15 𠊎愛將你準做打榖機，安又新又利个齒；你會打碎山嶺，使它兜成做泥粉；你會打爛山岡，使它兜像礱糠。 16 你會將它兜簸起來，俾風吹散，俾大風將它兜掃走。你就會當歡喜，因為𠊎係你个上主；你會讚美𠊎—以色列神聖个上帝。 17 𠊎窮苦个子民尋毋到水啉，佢等當嘴燥个時，𠊎—上主愛聽佢等个祈禱；𠊎—以色列个上帝一定毋會㧒掉佢等。 18 𠊎愛使大河出現在荒山中，使泉水在山壢中湧出來。𠊎愛使沙漠有陂塘，使旱地有水源。 19 𠊎愛在沙漠中種香柏樹㧯金合歡木，也種石榴樹㧯橄欖樹。曠野中會生有松樹、杉仔、㧯黃楊樹。 20 大家一看就會知，一想就會了解：𠊎係上主；這兜事係𠊎个手完成个，這兜係以色列神聖个上帝創造个。 21 上主向假神挑戰講：你等愛為自家辯護！雅各个王恁樣宣佈：將你等最有力个理由提出來！ 22 你等來預言會發生个事，解釋先前事情个意義。來指示𠊎等，使𠊎等有辦法想到這兜事情个結局，抑係指示𠊎等將來个事件。 23 俾𠊎等明白將來會樣般，𠊎等就知你等係神。你等降福抑係降災，來使𠊎等又慌張又著驚。 24 你等算麼介東西！你等所做个全部係空空；拜你等个人非常可惡！ 25 𠊎已經在東方興起一個人，佢會靠𠊎个名祈求。𠊎愛喊佢對北方來攻擊你等；佢會踐踏君王像蹂泥，就像燒缶師傅踏泥。 26 你等當中敢有麼儕預言這事會發生，好使𠊎等講佢無毋著呢？你等當中確實無一儕提起恁樣个事；無人聽到你等講過恁樣个話！ 27 𠊎—上主最先㧯錫安講：看啊，你等看該兜事！𠊎將一個報好消息个賜給耶路撒冷。 28 𠊎看所有个神明，無一個有話好講；無一個有辦法應𠊎个問題。 29 所有个神明全部無影無跡；所有个偶像全部像風、係虛空！無一件事情做成功。