Bible

1 該時，七個婦女愛拉等一個男人，講：「𠊎等做得食自家、著自家；你肯做𠊎等名義上个老公就好。求你除掉𠊎等个羞恥！」 2 到該日，上主愛使這土地逐頭果樹个樹苗、各種植物个嫩筍生到又高又靚。以色列賸到个人民會因為土地个出產來誇口，感覺盡有體面。 3 該兜賸在錫安、留在耶路撒冷个人，全部會被人看做係聖潔个。佢等住在耶路撒冷，佢等个名記錄在生命冊上。 4 主个靈愛來審判、焚燒，來潔淨錫安个婦女，又將耶路撒冷个污穢㧯血洗淨。 5 該時，在錫安山頂，大家聚集个所在，上主會在日時頭用雲遮等佢等，在暗晡時用煙火照等佢等。上帝个榮光會像帳篷保護全城； 6 佢个榮光會在日時頭當做遮日頭个涼亭，在狂風暴雨个時做避難所。