Isaiah 3
1 至高个上主—萬軍个元帥愛將耶路撒冷㧯猶大人民日常所需要个全部拿走；佢愛拿走佢等所偎靠个食物㧯水。
2 佢愛消滅佢等个英雄㧯戰士，法官㧯先知，算命个㧯長老，
3 軍事家㧯民間領袖，參謀、手藝師傅㧯行邪術个人。
4 上主愛用後生人做佢等个領袖，俾無經驗个細人仔管佢等。
5 人民逐儕會欺負來、欺負去；後生人看輕老人家；卑賤个侮辱尊貴个。
6 到該日，會有人在佢自家个家族中選出一儕，講：「你還有面衫好著，你來做𠊎等个領袖！這敗壞个所在給你管好哪！」
7 該人會大聲應：「毋好選𠊎做人民个領袖；𠊎無法醫好你等个傷害。𠊎屋下無食个，也無著个。」
8 耶路撒冷會橫！猶大會倒！因為佢等所講个話，所做个事無一樣無違背上主；佢等公開侮辱上帝个榮光。
9 對佢等个面色就看得出佢等个壞心術。佢等㧯所多瑪人共樣，公開犯罪。佢等會堵到災難了；佢等惡有惡報。
10 愛向正直个人講，佢等會事事順利；佢等會享受自家工作个成果。
11 總係做壞事个人會堵到災禍；佢等會因為自家所做个壞事受到報應。
12 論到𠊎个子民，佢等會被細人仔欺負，被婦女管制。𠊎个子民啊，你等个領袖𢱋毋著路，害你等行差路。
13 上主愛來辯論；佢愛企起來宣判萬民。
14 上主進入法庭審判佢子民中个長老㧯領袖，宣判佢等个罪，講：「你等破壞葡萄園；你等屋肚堆滿對窮苦人搶來个東西。
15 你等做麼介欺壓𠊎个子民，卸窮苦人个面皮呢？𠊎—至高个上主、萬軍个元帥恁樣講。」
16 上主講：「你等看，錫安个婦女樣般驕傲！姖等行路，頭那擎高高。姖等目珠打眼拐，行路無正經，腳鈪叮叮噹噹。
17 所以，𠊎一定愛責罰姖等；使姖等發臭頭，赤身露體。」
18 在該日，主愛將錫安婦女打扮个東西全部拿走，就係姖等腳鈪、頭那毛網、金簪㧯月型个脖鍊、
19 耳環、手鈪、幪面紗、
20 姖等个帽仔、腳鍊、花帶、香包、符袋、
21 禁指、鼻環、
22 禮服、外套、披肩、錢包、
23 手鏡仔、麻紗手帕、包頭巾、幪身帕。
24 姖等無再用香水，身體發出臭味；無再繫盡靚个腰帶，換粗麻索束腰；無再䌈盡靚个髻鬃，反轉變光頭；無盡靚个衫褲好著，反轉繫麻布衫；靚靚个面反轉㸐到媸媸。
25 城肚个男人會橫在刀下，勇士會死在戰場。
26 錫安个城門會傷心大噭；城市會荒涼到像婦女，衫褲被人脫淨淨，坐在地泥下。