Isaiah 33
1 𠊎等个敵人會堵到災難了！佢等緊去搶別人，毋識被人搶過；佢等詐欺人，毋識被人詐欺。總係等到佢等無法度去搶人、再詐欺人个時，佢等就會被人搶、被人詐欺了。
2 上主啊，求你憐憫𠊎等。𠊎等將希望交託你。求你日日保護𠊎等，在𠊎等危險个時拯救𠊎等。
3 你為𠊎等戰爭，萬國就會四散，相㓾个聲一發出，眾敵人就會逃走。
4 佢等个戰利品全部被人搶走，像農作物被經過个草蜢食淨淨一樣。
5 上主實在偉大！佢對天頂管理萬物。佢使錫安充滿正義㧯公平，
6 又使國泰民安。佢永遠保護佢个子民，賜佢等智慧㧯見識。敬畏上主就係佢等最大个財寶。
7 看哪，勇士在街項呼求幫助；尋求和平个使者發出痛苦个噭聲。
8 大路危險，無人敢行。條約廢掉、合同無效；人㧯人互相無信任。
9 土地荒涼；黎巴嫩个樹林枯燥；沙崙个山壢荒掉；巴珊㧯迦密山个樹葉全部落淨淨。
10 上主對萬國講：「這下𠊎愛開始行動！𠊎愛俾你等看到𠊎个力量有幾大！
11 你等个計劃係礱糠；你等个行動係禾稈。𠊎个靈愛像火恁樣將你等所做个燒掉！
12 你等會像石頭燒掉，成做石灰，像割下來个竻仔被火燒掉，成做火灰。
13 遠方个人啊，你等愛聽𠊎所做个一切；附近个人啊，你等愛承認𠊎个權能。」
14 在錫安个罪人會著驚、無敬虔个人會驚到愊愊掣。佢等講：「上帝个審判像永遠毋會烏掉个火，𠊎等中間有麼人毋會被這個火燒掉呢？」
15 若係你等行為正派，講話誠實，你等就能生存。毋好欺負窮苦人；毋好被人收買；毋好參加㓾人个計謀；毋好做壞事。
16 恁樣，你等就會有安全，像住在堅固个城堡中恁穩當。你等个糧食充足，水源毋會燥掉。
17 你等會再看到一個君王个榮光、㧯當闊个國土。
18 你等會回想頭擺得人驚个事，自家問自家講：「收數个在㖠位，打稅个在㖠位，掌城門个在㖠位？」
19 你等毋會再看到該兜強暴个人講你等聽毋識个外國話。
20 你等看錫安！它係𠊎等慶祝節期个城。你等看耶路撒冷！𠊎等在這底背樣般安全！它會像永遠毋會徙走个帳篷；它个矛釘毋使再挷出來，索仔永遠毋會拉斷。
21 上主愛在該位顯明佢个榮光。𠊎等會住在河壩當闊个河滣；敵人撐个大船毋會在該位經過。
24 住在𠊎等國內个人毋會再有病痛个艱苦；城內人民个罪也全部得到赦免。