Isaiah 24
1 上主愛毀滅大地，使它荒涼。佢愛將土地揙轉過來，將人民分散出去。
2 無論人民抑係祭司，奴才抑係主人，買个抑係賣个，債主抑係欠債个，窮苦个抑係富足个，全部會受到共樣个命運。
3 土地荒涼，一些仔出產也無。上主恁樣宣佈了。
4 土地變盡瘦盡燥；全世界敗壞掉去；連世上坐大位个人也變腐敗。
5 地上个人毋遵守法律，違反上帝所立永遠个約，打衊佢等所住个土地。
6 所以，上帝咒詛土地，使它敗壞。人民付出佢等所做所行个代價。地上个人像被火燒，賸下來个人越來越少了。
7 葡萄藤枯燥，新酒也盡少。心中歡樂變做悲傷；
8 琴聲、鼓聲全部停掉；歡樂个聲音也無了。
9 無人再啉酒作樂，無人嘗得出酒个甘甜。
10 城肚一片混亂，家家戶戶門鎖到𢫮𢫮，驚人偷入去。
11 有人在街項吵愛啉酒；一切个歡樂無掉去，地上無麼介生趣。
12 城肚荒涼，城門完全毀壞。
13 世上列國全部會有共樣个災難，就像收成後，橄欖樹頂無橄欖，葡萄藤項無葡萄。
14 災難過後還生个人會歡喜快樂唱歌。西方个人愛稱讚上主个偉大；
15 東方个人愛頌讚佢；住在海島个人也愛讚美上主—以色列个上帝。
16 對天涯海角𠊎等聽到有人唱歌，講：「榮耀歸給公義个上主。」總係𠊎認為𠊎會有災難了，𠊎壞了！𠊎慘了！詭詐个人緊來緊詭詐；佢等个行為得人驚到至極。
17 地上个人民啊，有災難、陷阱、羅網等等你等。
18 閃過災難个人會跌落陷阱；爬出陷阱个人會被羅網纏到；因為天頂个水門全打開來，地个根基也緊顫。
19 地面會裂開、碎掉、崩掉。
20 大地會搖動，像啉酒醉个人橫來橫去，像風差中个茅寮搖搖擺擺。大地被重罪磧到落掉、永遠毋會再企起來。
21 到該日，上主愛責罰天界个掌權者㧯地上个列王。
22 佢等會像犯人恁樣被人喊過來，逐入地牢。上主愛將佢等關在該位，等到責罰个時節來到。
23 月光會見笑到毋會發光，日頭會壞勢到烏掉；因為上主—萬軍个元帥會在耶路撒冷，在錫安山頂掌權；民間个領袖全部會看到佢个榮光。