Isaiah 23
1 下背係有關泰爾个信息。他施个船仔該兜船員啊，愛盡噭噢！你等家鄉个泰爾港已經毀滅了，屋㧯海港也打壞了。你等个船仔對塞浦路斯轉來个時，就會聽到這個消息。
2 海滣个人民，西頓个生理人啊，你等愛偷偷仔噭，
3 雖然你等過海去做生理，將埃及出產个五榖賣給各國。
4 總係西頓城啊，你會感覺當見笑；因為深海㧯大海毋認你，講：「𠊎無辛苦𢱋過細人仔，也無𫱔過子女。」
5 連埃及人聽到泰爾毀滅个消息也會當著驚。
6 腓尼基人啊，你等愛傷心盡噭，你等會想愛逃到他施去！
7 這係歷史當久、繁榮个泰爾城麼？係識送人到外國去建立殖民地个城麼？
8 泰爾係京城；它个生理人係出名个貴族。係麼人使它變到恁衰呢？
9 這係上主—萬軍个元帥所計劃个；佢愛廢掉佢等一切个驕傲，使地上有名望个人全部變做謙卑。
10 在他施殖民地个人啊，你等會像尼羅河个水恁樣到處流浪，無人會保護你等了。
11 上主个手已經伸過大海，去打擊該片个國家。佢命令毀滅腓尼基个商業中心。
12 西頓城啊，你个好日仔已經過掉了！你个人民會受欺壓，就算佢等走到塞浦路斯去，也得毋到安全。
13 (該群帶等野獸來吞食泰爾个，係巴比倫人，毋係亞述人。巴比倫人準備愛攻破泰爾个城堡城牆，使該城變做荒埔。)
14 他施个船仔該兜船員啊，愛傷心盡噭！你等所倚靠个城市已經毀滅了。
15 泰爾城被人毋記得个時節會到了；它會被人毋記得七十年，堵好係一個國王个壽年。七十年後，泰爾會像該詩歌所描寫个妓女：
16 拿起你个豎琴，到城肚去𫟧；你這可憐、被人毋記得个妓女，彈你个琴、唱你个歌！無一定你該兜情郎還會轉來！
17 七十年過後，上主愛俾泰爾恢復貿易。泰爾會㧯世界盡多國家做生理。
18 它會將做生理賺个錢奉獻給上主。它毋會再偷偷仔囥錢銀；它个錢反轉會交給敬拜上主个人，使佢等食飽飽、著靚靚。