Bible

1 波斯王塞魯士登基做皇帝个第一年，上主為到實現佢通過先知耶利米所講个預言，就感動塞魯士頒佈命令，用字寫下來，傳到全帝國逐所在講： 2 「這係波斯皇帝塞魯士个命令：上主—天頂个上帝俾𠊎做全世界个統治者；佢愛𠊎負責在猶大个耶路撒冷為佢起一座殿。 3 願上帝㧯你這兜屬佢个子民同在。你等愛到猶大个耶路撒冷去，重新起上主—以色列上帝个聖殿；佢係在耶路撒冷个上帝。 4 若係流亡个子民中，有需要幫助正做得轉去个，佢等个鄰舍就愛用金銀、財物、頭牲幫助佢等，另外還愛為耶路撒冷上帝个聖殿甘心獻禮物。」 5 所以，猶大㧯便雅憫个族長、祭司㧯利未人，還有逐個被上帝感動个人全部準備好，愛轉到耶路撒冷去重新起上主个聖殿。 6 隔壁鄰舍全部幫助佢等，拿銀器、金仔、財物、頭牲，㧯其他值錢个東西給佢等，另外還為聖殿獻各樣个禮物做甘心祭。 7 塞魯士皇帝也將以前尼布甲尼撒王對耶路撒冷上主个聖殿搶來放在自家神廟中个用品還佢等。 8 波斯皇帝塞魯士派財政大臣米提利達點算這兜用品；米提利達就開一份清單給猶大省長設巴薩， 11 金碗、銀碗㧯其他所有用品，總共有五千四百件。流亡个人對巴比倫轉來个時，設巴薩將這兜用品全部帶到耶路撒冷。