Ezekiel 8
1 𠊎等被人捉來个第六年，六月初五，該兜對猶大被人捉來个長老到吾屋下來看𠊎。至高上主个能力忽然間臨到𠊎。
2 𠊎一看，看到一個形像像人个樣仔；佢个身體腰圈下背像火，腰圈以上像發光个純金。
3 佢伸出一隻像手个樣仔，捉等𠊎个頭那毛。接等，在異象中，上帝个靈將𠊎擎到空中，帶𠊎到耶路撒冷，到聖殿北門內院个入口。該位有一隻惹上帝發譴个偶像。
4 在該位，𠊎看到以色列上帝个榮光，就像𠊎在迦巴魯河壩滣所看到个共樣。
5 上帝㧯𠊎講：「人子啊，你向北看！」𠊎就向北看，就看到在走廊入口个祭壇堘頭，該位有一隻惹上帝發譴个偶像。
6 上帝㧯𠊎講：「人子啊，你看到佢等做麼介麼？你看，以色列人在這位做恁邪惡个事，迫𠊎離開𠊎个聖所遠遠。總係，你會看到比這還較邪惡个事。」
7 佢帶𠊎去外院个入口，看到圍牆有一隻孔仔。
8 佢講：「人子啊，你愛在圍牆這位挖一隻大孔仔。」𠊎挖一隻大孔仔，看到有一隻門。
9 佢㧯𠊎講：「入去，看佢等在該位所做邪惡个壞事。」
10 𠊎就入去看；看到滿壁畫當多蛇㧯其他無淨浰个動物，還有以色列人所拜个偶像。
11 有七十個以色列長老在該位，沙番个孻仔雅撒尼亞也在當中。逐儕㨮等一隻香爐，煙个香味衝等上。
12 上帝㧯𠊎講：「人子啊，你有看到以色列个長老偷偷仔做麼介麼？佢等在充滿偶像个房間肚禮拜。佢等尋理由講：『上主看毋到𠊎等；佢㧒掉這所在了。』」
13 接等，上主㧯𠊎講：「你還會看到佢等做比這還較邪惡个事。」
14 然後佢帶𠊎到聖殿北門，俾𠊎看一群婦人家；姖等堵好坐在該位為搭模斯神个死噭吱。
15 上主講：「人子啊，你有看到麼？你還會看到比這還較邪惡个事。」
16 然後佢帶𠊎到聖殿个內院。在聖殿內院个入口，在祭壇㧯走廊中間，大約有二十五個人，背向內院，面向東方，在拜正出來个日頭。
17 上主㧯𠊎講：「人子啊，你有看到麼？你看，這兜猶大人在全國逐所在行暴力个事還毋滿足，還愛走到聖殿肚來做這邪惡个事來惹𠊎發譴。看啊，佢等用最無禮个行動侮辱𠊎。
18 所以，𠊎愛向佢等大發譴。𠊎毋饒佢等，也毋憐憫佢等。就算佢等大聲喊來求𠊎，𠊎也毋聽。」