Ezekiel 43
1 該人又帶𠊎到向東个門。
2 𠊎看到以色列上帝个榮光對東方來。佢个聲像吼吼滾个大水聲；地就因為佢个榮耀發光。
3 這個異象㧯以前𠊎看到上帝毀滅耶路撒冷个異象，並𠊎在迦巴魯河壩滣看到个異象共樣。所以𠊎就伏在地上。
4 上主个榮光通過東門進入聖殿。
5 上主个靈將𠊎擎起來，帶𠊎到內院。在該位，𠊎看到聖殿充滿上主个榮光。
6 該人企在𠊎堘頭；𠊎聽到上主對聖殿肚向𠊎講話。
7 佢講：「人子啊，這所在係𠊎个寶座，𠊎踏腳个所在；𠊎愛永遠住在以色列人當中統治佢等。以色列人㧯佢等个君王全部毋會再去拜偶像，抑係為已經死掉个君王立紀念碑，來侮辱𠊎个聖名。
8 佢等王宮个門檻㧯門柱憑等𠊎聖殿門檻㧯門柱，𠊎等當中只有隔一扇壁。佢等識用邪惡个行為侮辱𠊎，所以𠊎大發譴，將佢等消滅掉。
9 這下佢等一定愛停止拜偶像，愛拆掉佢等為先王所立个紀念碑，恁樣，𠊎就永遠住在佢等當中。
10 「人子啊，你愛將聖殿个設計㧯以色列人講，俾佢等研究。愛使佢等因為自家个罪惡來感覺到見笑。
11 若係佢等感覺自家見笑，你就向佢等說明這聖殿个設計：包含聖殿个模型、出入口、外形、內部个佈置，㧯所有个條例規則。你愛在佢等面前將這兜寫下來，俾佢等知應該樣般佈置，又照條例規則執行。
12 聖殿个規定係恁樣：聖殿愛起在山頂，聖殿个四周圍全部係聖地。」
13 祭壇个大細係恁樣：量祭壇个尺寸㧯量聖殿个尺寸共樣。祭壇个壇底四圍有槽，深五十公分，闊五十公分，外緣有二十五公分高个邊。
14 祭壇个底層對槽底算起有一公尺高；中層對底層个外緣向內跔入五十公分，有兩公尺高。上層也對中層外緣向內跔入五十公分。
15 上層，就係燒牲儀个所在，也係兩公尺高，四角頭有突出來个角。
16 祭壇个上層係四方个，逐片長六公尺。
17 中層也係四方个，逐片長七公尺，外緣有邊，高二十五公分。(四周圍有槽，闊五十公分。)上祭壇个段仔向東片。
18 至高个上主對𠊎講：「人子啊，愛注意聽！下背係有關奉獻祭壇个條文。祭壇做好以後，你愛在祭壇頂獻燒化祭，洒牲儀个血。
19 只有利未支族、撒督後代个祭司正做得到𠊎面前事奉𠊎。這係𠊎—至高上主个命令。你愛給佢等一隻細牛牯做贖罪祭。
20 你愛用這牲儀个血膏在上層突出來該四隻角、中層个四隻角，㧯外緣个邊。你愛恁樣潔淨祭壇，分別它為聖。
21 你愛將贖罪祭个細牛牯，帶到聖殿外背指定个所在燒。
22 第二日你愛用無缺點个山羊牯做贖罪祭。你愛用牠个血潔淨祭壇，像你用細牛牯个血潔淨祭壇共樣。
23 祭壇潔淨以後，你愛帶一隻無缺點个細牛牯㧯綿羊牯
24 到𠊎面前來。祭司愛將鹽委在牠兜身上，做燒化祭獻給𠊎。
25 七日內，你愛逐日獻一隻細牛牯、山羊牯、綿羊牯做贖罪祭。這兜頭牲一定愛無缺點个。
26 七日內，祭司愛潔淨祭壇，將它分別為聖。
27 對第八日起，祭司愛在祭壇頂為人民獻燒化祭㧯平安祭。恁樣，𠊎就會接納你等。𠊎—至高个上主恁樣宣佈了。」