Ezekiel 44
1 該人帶𠊎轉到聖殿外院个東門。這門係關等个。
2 上主㧯𠊎講：「這門一定愛永遠關等，做毋得打開來。所有个人做毋得對這門出入，因為𠊎—上主、以色列个上帝已經對這門入去。這門愛永遠關等。
3 只有在位个君王，佢做得到這位來，坐在𠊎面前食供餅。佢一定愛對外院个門廊出入。」
4 接等，該人帶𠊎通過北門，來到聖殿頭前。𠊎一看，就看到上主个榮光充滿佢个聖殿；𠊎就伏在地上。
5 上主㧯𠊎講：「人子啊，愛注意你所看到、所聽到个一切。𠊎愛將這聖殿个規則條例㧯你講。你愛注意㖠種人做得入去聖殿，㖠種人做毋得入去聖殿。
6 「你愛㧯該兜悖逆个以色列人講，𠊎—至高个上主毋會再吞忍佢等所做一切邪惡个事。
7 佢等向𠊎獻牲儀个油㧯血个時，也俾該兜無接受割禮、毋服從𠊎个外族人入到聖殿，來打垃圾𠊎个聖殿。𠊎个子民做這一切邪惡个事，違背𠊎个約。
8 佢等自家無在𠊎个聖殿執行有關聖物个規矩，反轉喊外族人來負責。
9 「𠊎—至高个上主恁樣宣佈：無接受割禮、毋服從𠊎个外族人，做毋得入去𠊎个聖殿，連住在以色列人當中个外族人也做毋得入去。」
10 上主㧯𠊎講：「有兜利未支族个人跈其他个以色列人行差路、離開𠊎遠遠、去拜偶像，佢等一定愛擔當自家个罪過。
11 佢等做得在𠊎个聖殿做掌門个，在聖殿做工人。佢等做得代人民㓾頭牲做燒化祭㧯其他个祭物，輪班企等為人民服務。
12 總係，佢等識代以色列人主持拜偶像个事，害人民犯罪，所以，𠊎—至高个上主發誓，佢等一定愛擔當自家个罪過。
13 佢等做毋得做祭司來事奉𠊎，也做毋得接近𠊎个聖物抑係入去至聖所。這就係佢等做該兜邪惡个事應該受个刑罰。
14 𠊎愛派佢等做工人，掌聖殿，並辦理其中一切个事物。」
15 至高个上主講：「其他以色列人離開𠊎个時，利未支族、撒督後代个祭司繼續在聖殿誠心事奉𠊎。所以，這下只有佢等正做得接近𠊎，事奉𠊎。佢等愛在𠊎面前獻牲儀个油㧯血。
16 只有佢等正做得入去聖殿，在𠊎个祭壇前事奉，執行𠊎所吩咐个責任。
17 佢等入內院个門，一定愛著麻紗个衫褲。佢等在內院肚抑係聖殿值班个時，絕對做毋得著羊毛个衫褲。
18 佢等愛用麻紗包頭那，著麻紗褲，總係做毋得著會使身體出汗个衫褲。
19 佢等到外院㧯人民接近，愛先脫掉在聖殿值班時所著个禮服，放在聖殿个橫屋，著別个衫褲，正毋會使聖服傷害人民。
20 「祭司做毋得剃光頭抑係留長頭那毛。頭那毛愛修剪。
21 祭司入去內院以前，所有个酒做毋得啉。
22 祭司做毋得㧯寡婦抑係離婚个婦人家結婚。祭司單淨做得㧯以色列个童貞女抑係祭司个寡婦結婚。
23 「祭司愛教導𠊎个子民分別聖㧯俗，禮儀上淨浰个抑係無淨浰个東西。
24 祭司愛照𠊎个法律判斷糾紛。佢等愛照𠊎个規則條例遵守宗教節期，守安息日做聖日。
25 「除了自家个爺𡟓、子女、兄弟，抑係無出嫁姊妹个屍體以外，祭司因為摸到別人个屍體會使自家在禮儀上無淨浰。
26 佢淨浰以後，一定愛等七日。
27 佢入去聖殿个內院，在聖殿事奉該日，愛先為自家獻贖罪祭。𠊎—至高个上主恁樣宣佈了。
28 「祭司所分到个產業就係祭司个職份。佢等做毋得在以色列中分土地做產業。𠊎係佢等个產業。
29 素祭、贖罪祭，㧯贖過失祭全部愛給祭司做食物。以色列中所有獻給𠊎个東西全部愛給佢等。
30 逐年第一擺收成个農作物㧯獻給𠊎特別个禮物全部愛給祭司。人民焙餅个時，愛將第一垤給祭司，恁樣，𠊎就賜福給佢等个家。
31 祭司做毋得食自然死掉抑係被野獸咬死个鳥仔㧯頭牲。」