Ezekiel 38
1 上主㧯𠊎講話；
2 佢講：「人子啊，你愛責備瑪各地區米設㧯土巴兩國个統治者歌革。你愛講預言責備佢，
3 㧯佢講，𠊎—至高个上主恁樣講：歌革啊，𠊎愛㧯你做對敵。
4 𠊎愛將你捩轉頭來，用鉤仔鉤你个頦鰓，將你㧯你帶領个軍隊共下拉走。你个軍隊有當多戰馬㧯裝備整齊个騎兵。逐個兵仔全部有盾牌㧯劍。
5 你个軍隊中還有對波斯、古實㧯弗請來个兵仔；佢等全部拿等盾牌，戴等鐵帽。
6 另外還有對歌篾㧯北方个陀迦瑪來个軍隊，並對其他各國來个軍隊。
7 你愛聚集軍隊，將佢等訓練好，你自家愛做佢等个指揮官。
8 過幾年，𠊎愛派你去佔領一個國家；該國个人民係對各國轉來个，這下享受太平。你愛佔領以色列該兜山；這所在以前被人㧒掉，非常荒涼，總係這下有盡多對各國轉來个人在該位安居。
9 你所帶領个軍隊、㧯對各國來同你共下个軍隊，會像烏雲遮等這垤土地，像狂風攻擊全地。」
10 至高个上主對歌革講：「到該時，你會有壞心術、陰謀詭計，
11 侵略該兜無設防个鄉村—該兜無城牆、無門閂、人民安享太平个鄉村。
12 你會想搶劫並出手攻擊以前荒掉、這下盡多人住个所在。該兜人民係對各國聚集到這世界个中心來住个。佢等有得到盡多頭牲㧯財物。
13 示巴人、底但人、㧯對他施逐城市來个生理人會問你：『你召集大軍來攻打係為到愛搶劫係麼？你想愛搶金銀、帶走頭牲、搶走一切个財物做戰利品係麼？』
14 「所以，人子啊，你愛講預言，對歌革講，𠊎—至高个上主恁樣講：𠊎个子民以色列還安居樂業个時，你愛出發。
15 你愛離開最北方个本土，帶領各國聯合組成、大陣又當強个騎兵隊，
16 去攻打𠊎个子民以色列；你个軍隊會像烏雲恁樣將全地遮掉。該時，𠊎愛派你上去侵略𠊎个土地，使列國認識𠊎；𠊎也愛用你所做个向佢等證明𠊎係神聖个。
17 你就係𠊎以前所預告愛來个人。該時，𠊎通過𠊎个僕人—以色列該兜先知宣告講，將來𠊎愛喊一個人來攻打以色列。」至高个上主恁樣宣佈了。
18 至高个上主講：「歌革侵略以色列該日，𠊎愛大發譴。
19 𠊎非常受氣、大發火、宣佈講：在該日，以色列會有大地動。
20 海肚个魚、空中个鳥仔、地上个大細動物，㧯人類全部會因為驚𠊎就愊愊掣。該兜山㧯山巖會崩裂，城牆會橫掉。
21 𠊎愛用各種災難攻擊歌革。𠊎—至高个上主恁樣宣佈了。𠊎愛使佢个軍隊發生內亂，各人殘殺同胞。
22 𠊎愛用發瘟㧯流血个事件來責罰佢。𠊎愛用大水、冰雹、大火、硫磺降落在佢㧯佢帶領个軍隊並佢指揮个各國軍隊身上。
23 𠊎愛用恁樣來向列國證明𠊎係偉大、神聖个上帝。該時，佢等就會知𠊎係上主。」