Ezekiel 39
1 至高个上主講：「人子啊，你愛講預言責備米設㧯土巴兩國个統治者歌革。愛㧯佢講，𠊎—至高个上主恁樣講：𠊎愛㧯你做對敵。
2 𠊎愛將你捩轉頭來，帶你離開北方个所在，𢱋你到以色列个群山頂。
3 然後，𠊎愛打掉你左手揢等个弓，右手拿等个箭。
4 你㧯你个軍隊，並各國个聯軍全部會死在以色列該兜山頂。𠊎愛將你等个屍體給飛鳥㧯野獸做食物。
5 你等个屍體會橫在野外。𠊎—至高个上主恁樣宣佈了。
6 𠊎愛放火燒瑪各个土地㧯在海滣安居樂業个人民。恁樣，佢等就會知𠊎係上主。
7 𠊎愛𠊎个子民以色列認識𠊎个聖名，𠊎絕對毋會再俾𠊎个聖名受到侮辱。恁樣，列國就會知𠊎—上主係以色列神聖个上帝。」
8 至高个上主講：「𠊎所預言該日一定會來到。
9 以色列逐城市个人民愛出去拈被人㧒掉个武器當做柴。佢等愛拿盾牌、弓、箭、棍仔、矛槍當做柴來燒；這兜東西多到罅佢等燒七年。
10 佢等毋使到野外去拈柴，也毋使到樹林去斬樹仔，因為佢等有被人㧒掉个武器好做柴。佢等愛搶該兜來搶佢等个人，劫該兜來劫佢等个人。」至高个上主恁樣宣佈了。
11 上主講：「這事發生以後，𠊎愛在以色列，在死海東片个『旅客山壢』尋一垤塚埔給歌革。過路个旅客會行毋過去，因為歌革㧯佢个軍隊全部會被人葬在該位。這山壢就愛喊做『歌革軍山壢』。
12 以色列人愛用七隻月个時間埋葬所有个屍體，來使該垤土地得到淨浰。
13 佢等愛集合全國个人來做埋葬个工作；在𠊎得榮耀个日仔，佢等會因為這個事變當有好名聲。𠊎—至高个上主恁樣宣佈了。
14 七隻月後，佢等愛派人繼續巡查逐所在，㧯過路个人共下將該兜還在地面上个屍體埋好，恁樣佢等正能使土地得到淨浰。
15 佢等在全國巡查，一看到有死人个骨頭就在骨骸堘頭做記號，等埋葬个人將它葬在『歌革軍山壢』。
16 (附近有一個村莊會用這軍隊安名哈摩那。)恁樣，土地就得到淨浰了。」
17 至高个上主㧯𠊎講：「人子啊，你愛對四面八方喊各種飛禽走獸來食𠊎為牠兜準備个祭肉。以色列該兜山頂會有大獻祭个筵席，牠兜愛在該位食肉啉血。
18 牠兜愛食勇士个肉，啉世間該兜領袖个血。這兜軍人會像綿羊牯、細羊仔、山羊牯、牛牯，全部像巴珊个肥牛恁樣被人㓾來食。
19 𠊎㓾這兜勇士像㓾獻祭个頭牲以後，飛禽走獸做得盡量食肉，啉血，直到撐飽啉醉。
20 牠兜愛在𠊎个飯桌頂食戰馬、騎兵、㧯所有士兵个肉，食到飽𩜰𩜰。𠊎—至高个上主恁樣宣佈了。」
21 上主講：「𠊎愛俾列國看到𠊎个榮光，俾佢等看到𠊎樣般出手執行𠊎公正个審判。
22 從該日以後，以色列人會知𠊎係上主—佢等个上帝。
23 列國會知以色列人係因為得罪𠊎正被人捉走。𠊎揞面毋看顧佢等，使敵人打敗佢等，㓾掉佢等。
24 𠊎對佢等个污穢㧯過犯施行報應。𠊎揞面毋看顧佢等。」
25 至高个上主恁樣講：「總係𠊎愛憐憫雅各个後代—以色列人，俾佢等重整家園，𠊎愛維護𠊎个聖名。
26 佢等重新安居在自家个土地，毋會再有人來威脅佢等个時，佢等就會毋記得因為悖逆𠊎所受个侮辱。
27 為到愛俾列國知𠊎係神聖个，𠊎愛對萬民中、對敵人該位將佢等帶轉本國。
28 該時，𠊎个子民就會認識𠊎係上主—佢等个上帝；因為以前𠊎使佢等分散到列國，這下𠊎又召集佢等，將佢等帶轉本國，連一個也無留在外國。
29 𠊎愛將𠊎个靈倒在以色列人；𠊎絕對毋會再揞面毋看顧佢等。𠊎—至高个上主恁樣宣佈了。」