Ezekiel 37
1 上主个大能臨到𠊎身上；佢个靈帶𠊎到山壢肚。該山壢肚滿遍係骨骸。
2 佢帶𠊎經過該兜骨骸當中，𠊎看到山壢肚堆滿盡燥个骨頭。
3 佢㧯𠊎講：「人子啊，這兜骨骸會返生麼？」𠊎應講：「至高个上主啊，只有你正知！」
4 佢講：「愛向這兜骨骸講預言，㧯燥骨骸講，愛聽上主个話。
5 愛㧯佢等講，𠊎—至高个上主對佢等講：𠊎愛歕氣入你等底背，使你等返生。
6 𠊎愛使你等生筋又生肉，然後包一層皮。𠊎愛歕氣入你等底背，使你等返生。恁樣，你等就會知𠊎係上主。」
7 所以，𠊎照上主个命令講預言。𠊎講个時，𠊎聽到挺動个聲，看到骨頭㧯骨頭連結起來。
8 𠊎當看个時，骨頭開始生筋又生肉，然後包一層皮，總係身體還毋會透氣。
9 上主㧯𠊎講：「人子啊，你愛向風講預言，㧯它講，至高个上主恁樣講：對四面八方吹來，吹入這兜被人㓾死个，使佢等返生。」
10 所以，𠊎照上主个命令講預言，氣進入到佢等底背，佢等就返生過來，又企起來。佢等就成做極大个軍隊。
11 上主㧯𠊎講：「人子啊，以色列全國人就像這兜骨骸。佢等認為自家骨頭燥掉，已經無希望，被人消滅淨淨。
12 所以，你愛向𠊎个子民以色列講預言，㧯佢等講，𠊎—至高个上主恁樣講：𠊎愛打開你等个墳墓，使你等䟘起來，𢱋你等轉到以色列本地。
13 𠊎打開你等个墳墓，使你等䟘起來以後，你等就會知𠊎係上主。
14 𠊎愛將𠊎个靈歕入你等底背，使你等返生，俾你等住在自家个土地。恁樣，你等就會知𠊎係上主。𠊎講過个，𠊎一定會實行。𠊎—上主恁樣宣佈了。」
15 上主又㧯𠊎講話；
16 佢講：「人子啊，你拿一支樹棍仔來，頂高寫『猶大王國』，又拿另外一支樹棍仔來，頂高寫『以色列王國』，
17 然後將兩支樹棍仔揢在手中，兩頭相接、連做一支樹棍仔。
18 若係你个同胞問你，這係麼介意思，
19 你就㧯佢等講，𠊎—至高个上主愛將代表以色列該支樹棍仔㧯代表猶大該支樹棍仔接共下，使兩支樹棍仔在𠊎手中成做一支。
20 「你愛在人民面前將該兩支有寫字个樹棍仔揢在手中，俾佢等看到。
21 然後，你愛㧯佢等講，𠊎—至高个上主愛將𠊎个子民對佢等被人捉去个各國帶出來，對四圍集合佢等，然後𢱋佢等轉到本國。
22 𠊎愛在該位，在以色列該兜山頂，將佢等聯合起來，成做一個國家。佢等會受一個君王个統治，毋會再分做兩隻國家。
23 佢等毋會再拜邪惡个偶像打垃圾自家，也毋會再敗壞犯罪。𠊎愛救佢等離開犯罪㧯悖逆个生活。𠊎愛洗淨佢等。佢等愛做𠊎个子民；𠊎愛做佢等个上帝。
24 會有一個像𠊎僕人大衛个君王出現；佢會做佢等个王，做佢等个牧人。佢等會誠心遵行𠊎个法律㧯誡命。
25 佢等會住在𠊎賜給𠊎僕人雅各該垤土地，就係佢等个祖先住過个土地。佢等㧯佢等个後代會永遠住在該位。會有一個像𠊎僕人大衛个君王永遠統治佢等。
26 𠊎愛㧯佢等立平安个約，係永遠个約。𠊎愛施恩照顧佢等，俾佢等人口增加，又愛使𠊎个聖殿永遠設立在佢等个土地。
27 𠊎愛㧯佢等住在該位。𠊎愛做佢等个上帝；佢等愛做𠊎个子民。
28 𠊎使𠊎个聖殿永遠設立在佢等當中个時，萬國就會知𠊎—上主揀選以色列，使佢分別為聖做𠊎个子民。」