Ezekiel 3
1 上帝講：「人子啊，將這書卷食落去，然後去向以色列人講話。」
2 所以𠊎打開嘴；佢將該書卷交給𠊎食，
3 講：「人子啊，將𠊎給你个這書卷食落去，裝滿肚笥。」𠊎就食；這書卷像蜂糖恁甜。
4 接等上帝講：「人子啊，你到以色列人該位去，將𠊎个話㧯佢等講。
5 𠊎毋係派你到該兜講話你聽毋識个人該位去；𠊎係派你去以色列人當中。
6 若係𠊎派你到該兜國家，到該兜講話你聽毋識个人該位去，佢等還會聽你个話。
7 總係，以色列人絕對毋會聽你个話；因為佢等連𠊎个話也毋肯聽。佢等全部當硬頸又硬殼。
8 你看，𠊎愛使你比佢等還較硬殼，使你个額頭硬過佢等个額頭。
9 𠊎愛使你个額頭像鑽石，比火石還較硬。你毋使驚該兜悖逆个人，也毋使被佢等个面色嚇倒。」
10 上帝繼續講：「人子啊，你愛注意聽𠊎一切个話，也愛記在心肚。
11 你愛去被人捉去个同胞該位，無論佢等愛聽抑毋聽，將𠊎—至高个上主愛對佢等講个話全部㧯佢等講。」
12 接等，上帝个靈將𠊎擎起來，𠊎就聽到在𠊎後背有𠾐𠾐滾个聲音講：「愛頌讚天頂上主个榮光！」
13 𠊎又聽到該四個生物翼胛憑到个聲，也聽到輪仔挺動、像地動發出恁響个聲。
14 上主个能力大大充滿𠊎；佢个靈將𠊎擎起來帶走个時，𠊎感覺盡艱苦又盡譴。
15 所以，𠊎來到迦巴魯河壩滣个提勒‧亞筆，就係被人捉去个同胞住个所在。𠊎在該位有七日久，被看到㧯所聽到个事嚇到戇神。
16 七日後，上主㧯𠊎講：
17 「人子啊，𠊎派你做以色列人个守望者。你愛將𠊎親身㧯你講个話警告佢等。
18 若係𠊎宣佈某一個壞人一定愛死，你毋去警告佢，勸佢棄邪歸正來救自家，這個人雖然會因為自家个罪死掉，𠊎卻愛追究你流厥血个責任。
19 若係你警告該壞人，佢毋肯改過，還係做壞事，佢愛因為自家个罪死掉，總係你會救到自家个命。
20 「若係好人離開正路，開始做壞事，𠊎會使佢堵到災難，佢一定會死。因為你毋警告佢，佢就會因為自家个罪來死，𠊎毋會紀念佢做過个好事；𠊎卻愛追究你流厥血个責任。
21 若係你警告該好人做毋得犯罪，佢接受你个警告，無再犯罪，佢一定毋會死，你也會救到自家个命。」
22 𠊎感覺到上主个能力大大充滿𠊎，又聽到佢㧯𠊎講：「企起來到山壢肚去，𠊎愛在該位對你講話。」
23 所以，𠊎到山壢肚去，在該位看到上主个榮光，㧯𠊎在迦巴魯河壩滣所看到个共樣。𠊎伏在地上；
24 上帝个靈入到𠊎个底背，將𠊎扶起來。上主㧯𠊎講：「轉屋下去，將你自家關在屋肚。
25 人子啊，別人愛用索仔將你捆起來，使你無法度出到佢等當中。
26 𠊎愛使你變做啞口，使你無法度警告這兜悖逆个人民。
27 後來，𠊎愛再對你講話，開你个嘴。該時，你愛將𠊎—至高个上主所講个話㧯佢等講。有兜肯聽，有兜毋肯聽，因為佢等係悖逆个人民。」