Bible

1 有幾個以色列个長老來坐到𠊎面前問𠊎。 2 該時，上主㧯𠊎講話； 3 佢講：「人子啊，這兜人當迷信，拜偶像，將害佢等犯罪个絆腳石擺在佢等面前。𠊎敢愛搭佢等个求問嗎？ 4 「你愛㧯佢等講，𠊎—至高个上主恁樣講：若有以色列人迷信，拜偶像，將害佢犯罪个絆腳石擺在佢面前，然後又來求問先知，𠊎愛因為佢拜恁多偶像來報應佢！ 5 所以該兜因為偶像來離開𠊎个以色列人，𠊎愛將佢等个心再揪轉來。 6 「所以，你愛㧯以色列人講，𠊎—至高个上主恁樣講：倒轉來！離開你等个偶像，離開該兜邪惡个東西！ 7 「無論係以色列人抑係住在你等當中个外族人，凡離開𠊎，迷信去拜偶像，敗壞，犯罪，然後又來求問先知个，𠊎自家愛教訓佢！ 8 𠊎愛責罰佢，拿佢來示眾，用佢來警告眾人。𠊎愛對𠊎个子民當中除掉佢。恁樣，你等就會知𠊎係上主。 9 「若係有先知被人騙走，回答人个時講毋著話，該係因為𠊎—上主由在佢被人騙走。𠊎愛責罰該先知，對以色列人當中除掉佢。 10 先知㧯請教佢个人愛受共樣个責罰。 11 𠊎恁樣做係愛使以色列人毋會再離開𠊎，毋會再犯罪，侮辱自家。佢等愛做𠊎个子民；𠊎愛做佢等个上帝。」至高个上主恁樣宣佈了。 12 上主㧯𠊎講話； 13 佢講：「人子啊，若係有一隻國家犯罪，對𠊎無忠心，𠊎愛伸手切斷佢等糧食个來源；𠊎愛使飢荒臨到，使人㧯頭牲全部餓死。 14 就算挪亞、但以理㧯約伯三儕全部住在該位，佢等个義也單淨救得到自家个命定定。」至高个上主恁樣宣佈了。 15 「𠊎若係使野獸在該國亂走害人，俾人驚到，毋敢經過該位，該地變做荒地， 16 𠊎—至高个上主指等𠊎永遠个生命發誓，就算該三個人住在該位，佢等也救毋到自家个子女；佢等單淨救得到自家定定，土地也會荒掉去。 17 「𠊎若係使該所在受到戰亂，當利个刀劍將人㧯頭牲全部㓾淨淨， 18 𠊎—至高个上主指等𠊎永遠个生命發誓，就算該三個人住在該位，佢等也救毋到自家个子女；佢等單淨救得到自家定定。 19 「𠊎若係使發瘟在該位流行，在大發譴當中消滅一切，將人㧯頭牲全部㓾淨淨， 20 𠊎—至高个上主指等𠊎永遠个生命發誓，就算挪亞、但以理㧯約伯全部住在該位，佢等也救毋到自家个子女；佢等个義單淨救得到自家定定。」 21 至高个上主恁樣講：「還會較慘噢！𠊎愛用戰亂、飢荒、野獸㧯發瘟這四種盡得人驚个災難來責罰耶路撒冷，將人㧯頭牲全部消滅。 22 若係有人無死，又救出自家个子女，佢等走到你等該位个時，你等愛注意看佢等有幾壞！恁樣，你等就會明白𠊎責罰耶路撒冷係應該个。 23 你等也會了解𠊎所做个一切係有理个。」至高个上主恁樣宣佈了。