Ezekiel 13
1 上主㧯𠊎講話；
2 佢講：「人子啊，你愛講預言；你愛責備以色列該兜靠自家講預言个先知。㧯佢等講，愛注意聽上主个話。」
3 至高个上主恁樣講：「這兜戇先知慘了！佢等个靈感係照自家个妄想；佢等个異象係自家編个。
4 以色列人啊，你該兜先知㧯在荒埔出入个野狗共樣。
5 裂縫佢等毋去補；橫掉个牆，佢等毋去整。所以，上主个日仔來到、戰爭發生个時，以色列人就企毋住。
6 佢等个異象係假个；佢等个預言係騙人个；佢等恅到自家係傳講𠊎个信息，其實，𠊎並無派佢等。佢等樣還希望所講个話會實現！
7 𠊎㧯佢等講：『你等所看到个異象係假个；你等个預言係騙人个。你等恅到這兜話係𠊎講个，其實，𠊎並無㧯你等講麼介！』」
8 至高个上主又㧯佢等講：「你等所講个話係騙人个；你等所看到个異象係假个；所以𠊎反對你等。
9 你這兜看到假異象、亂講預言个先知啊，𠊎愛責罰你等！你等做毋得參加吾子民个聚會；你等个名做毋得登記在以色列家个名冊底背。你等絕對做毋得轉到以色列个故鄉。恁樣，你等就會知𠊎係至高个上主。
10 「先知欺騙𠊎个子民，講：『平安！』其實無平安。𠊎个子民起無堅固个圍牆，先知就用白灰抹上去。
11 你愛㧯該兜先知講，佢等所抹个圍牆愛橫掉。𠊎愛使狂風大雨㧯大冰雹吹打圍牆，
12 圍牆就橫掉。有人會問：『你等抹圍牆有麼介用呢？』」
13 所以，至高个上主恁樣講：「𠊎愛發譴，用狂風大雨㧯大冰雹來打壞這圍牆。
14 𠊎愛拆掉你等抹過个圍牆，拆到貼貼，俾地基顯出來；圍牆愛橫掉，會磧死你等。恁樣，你等就會知𠊎係上主。
15 「𠊎愛在圍牆㧯抹圍牆个人身項將𠊎个大發譴拚到淨淨。𠊎愛㧯你等宣佈，圍牆㧯抹圍牆个人全部無掉去了。
16 該兜在無平安个情況之下，㧯耶路撒冷保證平安个以色列先知全部無掉去了。」至高个上主恁樣宣佈了。
17 上主講：「人子啊，這下你愛責備在人民當中亂講預言个婦女。
18 你愛㧯姖等講，至高个上主恁樣講：『你這兜婦女慘了！你等逐個人在手腕項攣行邪術个帶仔，戴揜頭那个頭巾做符筊，來控制人个生命。你等想愛得到一種能力，控制吾子民个生死，來求自家个利益嗎？
19 你等為到幾揢大麥、幾垤餅，就在𠊎个子民面前侮辱𠊎。應該生个，你等㓾掉；該死个，你等留等。你等㧯𠊎个子民講花撩，佢等也相信你等。』」
20 所以，至高个上主恁樣講：「𠊎惱你等拿來控制人生命个行邪術个帶仔。𠊎愛對你等个手腕揪掉該兜邪術个帶仔，救該兜被你等控制个人。
21 𠊎愛揪掉你等个做符筊个頭巾，救𠊎个子民，使佢等永遠毋會再受到你等个控制。恁樣，你等就會知𠊎係上主。
22 「𠊎無愛俾好人傷心，你等顛倒講花撩害佢等失望。你等毋俾壞人棄邪歸正來得救。
23 所以，你等自家所想出來个假異象，㧯亂編个預言全部愛結束了。𠊎愛救𠊎个子民離開你等个控制。恁樣，你等就會知𠊎係上主。」