Ezekiel 11
1 上主个靈將𠊎擎起來，帶𠊎到聖殿个東門。𠊎在東門附近看到二十五個人，當中有兩個民間領袖—押朔个孻仔雅撒尼亞㧯比拿雅个孻仔比拉提。
2 上主㧯𠊎講：「人子啊，這兜人在城肚計劃奸詐个事，詭計多端。
3 佢等講：『𠊎等無幾久就愛重建家園。這座城像鑊頭，𠊎等像底背个肉，得到鑊頭个保護。』
4 所以，人子啊，你愛講預言、用𠊎个話責備佢等。」
5 上主个靈忽然間臨到𠊎。上主㧯𠊎講，愛向人民傳這信息：「以色列人啊，你等个嘴所講、心所想个，𠊎全部知。
6 你等在這城肚㓾死恁多人，街路項堆滿屍體。
7 「所以，𠊎—至高个上主恁樣講：無毋著，這座城就係鑊頭；鑊頭肚个肉係你等㓾死个屍體。你等毋會在城肚，因為𠊎愛將你等㧒出城外。
8 你等驚刀劍麼？𠊎愛用刀劍攻打你等。
9 𠊎愛帶你等到城外，將你等交給外國人。𠊎已經判你等死刑。
10 你等愛因為戰爭死在自家个國家。恁樣你等就會知𠊎係上主。
11 這座城絕對無辦法保護你等，像鑊頭保護鑊頭肚个肉恁樣。無論你等在以色列麼介所在，𠊎全部愛責罰你等。
12 你等愛知𠊎係上主。你等跈鄰國个風俗習慣就係犯𠊎个法律，違背𠊎个命令。」
13 𠊎正講預言个時，比拿雅个孻仔比拉提忽然間死掉。𠊎伏在地上大聲喊：「至高个上主啊，連以色列賸下來个人，你也愛全部消滅係麼？」
14 上主㧯𠊎講話；
15 佢講：「人子啊，耶路撒冷个人民講到你同你共下被人捉去个以色列同胞个時，佢等講：『該兜被人捉去个同胞離開上主个聖所忒遠了。上主已經將這垤土地賜給𠊎等。』
16 「所以，你愛將𠊎个話傳給㧯你共下被人捉去个同胞。雖然𠊎將佢等逐到遠遠个列國，四散在無共樣个所在；總係𠊎還係愛㧯佢等共下，在佢等被人捉去个所在，做佢等暫時个聖所。
17 「所以，你愛將𠊎—至高个上主所講个話㧯佢等講。𠊎識將佢等四散到列國去；𠊎愛將佢等集合起來，帶佢等離開該位；𠊎愛將以色列个土地還佢等。
18 佢等倒轉去以後一定愛除掉所有邪惡个偶像。
19 𠊎愛將合一个心賜給佢等，將新个靈放在佢等底背；𠊎愛除掉佢等像石頭恁硬个心，賜給佢等有血有肉个心。
20 恁樣，佢等就會遵守𠊎个法律，忠心順服𠊎所有个命令。佢等愛做𠊎个子民；𠊎愛做佢等个上帝。
21 講到該兜心中歡喜拜邪惡偶像个人，𠊎愛責罰佢等。𠊎愛照佢等个行為責罰佢等。」至高个上主恁樣宣佈了。
22 基路伯打開翼胛，輪仔跈等佢等；以色列上帝个榮光在佢等頂高。
23 上主个榮光升上去，離開城，停在城東片該座山頂。
24 在異象中，上帝个靈將𠊎擎起來，帶轉被人捉去巴比倫个同胞該位。然後𠊎所看到个異象就毋見掉了。
25 𠊎就將上主指示𠊎所有个事情㧯被人捉去該位个同胞講。