Esther 1
1 亞哈隨魯做王个時代，統治印度到古實一百二十七省。
2 該時，佢在首都書珊城个王宮登基。
3 亞哈隨魯做王个第三年，佢為所有个貴族㧯行政官員辦大筵席。波斯㧯米底亞个文武百官，並各省个省長㧯貴族全部參加。
4 足足有六隻月，佢常常向佢等展佢王國个好額、昌盛㧯威嚴。
5 接等王又為到首都書珊全城个男人，無論貧賤富貴，在王宮个花園辦筵席，連續七日。
6 這花園用藍色㧯白色个布簾佈置，用紫色个麻紗帶仔將布簾固定在大理石𣎴仔項个銀圈。金銀做个眠椅放在鋪等白色、紅色、綠色大理石㧯珍珠殼个地上。
7 啉酒用个杯仔係各種無共花色个金杯。所啉个酒係王家用个，準備非常多，表現王个誠意。
8 王吩咐宮中个僕人，俾大家隨意啉，做毋得勉強人。
9 同時，在王宮內，王后華實蒂也為婦女辦筵席。
10 在筵席个第七日，亞哈隨魯王啉酒到當歡喜，就吩咐服事佢个七個太監米戶幔、比斯他、哈波拿、比革他、亞拔他、西達㧯甲迦，
11 去請王后華實蒂戴等冕旒入來。王后係一個盡靚个婦人家；王想愛向官員、貴賓展王后个美貌。
12 總係，太監將王个命令傳給王后華實蒂个時，姖毋肯來。王大發譴，閼到火當𤏸。
13 王逐擺堵到法律抑係正義个問題，就會問專家个意見，所以佢召集顧問團來。
14 佢最親信个顧問係：甲示拿、示達、押瑪他、他施斯、米力、瑪西拿㧯米慕干。這兜人係波斯㧯米底亞个七個大臣，長透接近王，在國內坐最高个地位。
15 亞哈隨魯王問佢等：「𠊎派太監傳命令給王后華實蒂，總係姖毋肯聽從。照法律，𠊎等愛樣般辦姖？」
16 米慕干在王㧯其他官員面前應講：「王后華實蒂毋單淨侮辱王，也侮辱到王逐省个官員㧯人民！
17 國內个婦人家若係聽到王后所做个事，就會看毋起自家个老公。姖等會講：『亞哈隨魯王命令王后華實蒂去見佢，總係姖毋去。』
18 波斯㧯米底亞該兜官員个𡜵娘一聽到王后這種行為，當遽就會照樣對待姖等个老公；恁樣一定會發生盡多个藐視㧯不滿。
19 若係國王認為恁樣好，請頒佈命令：對這下開始，不准華實蒂再來見王。還愛將這命令寫下來，定做波斯㧯米底亞个法律，永遠做毋得改。又請國王將王后个地位賜給比姖較好个人。
20 國王个命令公佈到全國以後，雖然國境恁闊，逐個婦人家，無論老公係貧賤、係富貴，一定會好好尊敬自家个老公。」
21 王㧯佢个大臣全部認為這個意見當好，就照米慕干个建議去做。
22 王命令用逐省逐族个語言㧯文字通知逐省逐族：做老公應該係厥屋下个主人；佢个話有絕對个權柄。