Ephesians 2
1 頭擺，因為你等犯罪，悖逆上帝个命令，你等對靈性來講係死个。
2 該時，你等跈這世間邪惡个風俗，順從天界个掌權者，就係這下轄制該兜悖逆上帝命令个人个邪靈。
3 其實，頭擺𠊎等也同佢等共樣，放縱肉體个情慾，跈自家个私慾㧯意念去行。所以，𠊎等同別人共樣，註定愛受上帝个責罰。
4 總係上帝有豐盛个憐憫；佢對𠊎等个痛惜無窮無盡。
5 𠊎等个靈性在悖逆个罪惡中死掉个時，佢使𠊎等同基督共下生過來；你等个得救係倚靠上帝个恩典。
6 上帝又使𠊎等在基督耶穌个生命中同基督共下復活，同佢共下在天頂掌權。
7 上帝恁樣做係愛對世世代代表明佢極豐富个恩典，就係佢在基督耶穌底背對𠊎等顯現出來个慈愛。
8 你等个得救係靠上帝个恩典、憑信心來得到个；毋係因為你等个行為，係上帝賜給你等个。
9 既然毋係靠行為，你等就無麼介好誇口个。
10 𠊎等係上帝个作品，在基督耶穌底背造成个，目的係愛𠊎等行善；這係上帝早就計劃愛𠊎等去做个。
11 你等出世就係外邦人个，愛記得以前个情形：你等被自稱受過割禮个人—就係該兜用人个手在自家肉身行割禮个猶太人—稱做無受割禮个。
12 該時，你等同基督無關係，係外人，毋係上帝个選民。上帝對佢个子民所應許个契約，你等無份；你等在世間無希望，也無上帝。
13 你等頭擺係離開上帝遠遠个人，總係這下同基督耶穌結連共下，又因為基督流血來死，已經親近上帝了。
14 基督親自將和平賜給𠊎等；佢使猶太人㧯外邦人合一，用自家个身體拆掉該害佢等冤家分裂个牆。
15 佢廢除猶太法律个誡命㧯教條，目的係愛使這兩種人通過佢个生命成做一種新人，來成就和平。
16 通過在十字架頂个死，基督除掉冤仇；通過十字架，佢使兩片个人成做一體，㧯上帝和好。
17 恁樣，基督來傳和平个福音給所有个人，包含你這兜頭擺離開上帝遠遠个外邦人㧯親近上帝个猶太人。
18 因為𠊎等無論係猶太人抑係外邦人，攏總係通過基督，受共一位聖靈个感動，來到阿爸上帝个面前。
19 所以，你等外邦人無再係外人，也毋係生份人；你等係上帝子民个同胞，係上帝一家个人。
20 你等同猶太人共樣，也係起在使徒㧯先知个地基頂高，基督耶穌自家係屋棟連結个大樑。
21 倚靠佢，歸座建築就互相結連，漸漸擴大，成做主个聖殿。
22 倚靠佢，你等大家也共下被佢建造，成做上帝通過聖靈住个所在。