Ephesians 3
1 因為恁樣，𠊎—保羅為到你等外邦人个緣故做基督耶穌个囚犯，為你等求上帝。
2 你等一定有聽過，為到你等个好處，上帝施恩將一項職務交託給𠊎。
3 佢啟示𠊎，使𠊎知佢个奧秘。(𠊎已經將這奧秘簡略寫下來；
4 你等讀了就會了解，𠊎深知基督个奧秘。)
5 在以前个世代，上帝毋識俾麼人知這個奧秘；總係這下，佢已經通過聖靈啟示佢个聖使徒㧯先知了。
6 這奧秘个內容係恁樣：通過福音，外邦人愛同猶太人共下分享上帝个祝福，同屬一體，也同享上帝在基督耶穌底背所實現个應許。
7 上帝設立𠊎執行這傳福音个職務；這係照佢所運行个權能賜給𠊎个特別恩賜。
8 雖然𠊎係所有聖徒中最微細个，上帝還係賜𠊎特權，將福音，就係基督測毋透个豐盛，傳給外邦人，
9 使全人類知上帝樣般實行佢奧秘个計劃。在先前个世代，創造萬物个上帝將這奧秘囥等，
10 為到愛在這下个世代，通過教會，使天界个執政者㧯掌權者攏總會認識上帝無窮个智慧。
11 上帝恁樣做係照佢萬世不變个旨意；這旨意已經在𠊎等主基督耶穌个身上實現了。
12 通過信基督，𠊎等同佢結連，就做得好膽來到上帝个面前，全毋使驚。
13 所以，請你等毋好因為𠊎為你等受苦就灰心，反轉愛看做係你等个光榮。
14 因為恁樣，𠊎在阿爸面前跪下來祈禱。
15 天頂㧯地上所有个家族全部係佢安名个。
16 𠊎求上帝，照佢榮耀个豐盛，通過聖靈賜你等力量，使你等內在个生命勇健起來，
17 使基督通過你等个信心，住在你等个心中。𠊎也祈求上帝，使你等在佢个痛惜中有根也有基，
18 好使你等同眾聖徒共下體驗基督个痛惜係樣般个長、闊、高、深。
19 願你等正經體驗到基督該超過智識所能了解个痛惜，好使你等充滿上帝一切个豐盛。
20 上帝能用運行在𠊎等當中个能力成就一切，遠遠超過𠊎等所求所想个。
21 願佢在教會中並在基督耶穌底背得到榮耀，直到世世代代，永永遠遠！阿愐。