Lamentations 3— pcm

¹I bi one pesin wey know wetin e mean wen God ponish yu.

²E don porshu mi and naw I dey waka for darkness.

³Evritime, na only mi E dey always ponish.

⁴E don make my skin and flesh old kon break di bones for my body.

⁵Na sofa and wahala E pak full my life.

⁶Even doh I neva die, E beri mi for darkness like pesin wey don die.

⁷E don tie mi with shain like prisona wey nor get hope to eskape.

⁸I kry well-well make E help mi, but God nor gri ansa mi.

⁹E use big-big stones take block evriwhere wey I dey pass and I nor know di rite road again.

¹⁰To mi, E hide like bear or lion wey dey wait to attack pesin.

¹¹E drag mi komot for road; tear mi to pieces kon leave mi and nobody dey to help mi.

¹²E set en arrow to take shot mi die

¹³and naw, E don shot mi and di arrow enter my heart.

¹⁴I don turn pesin wey pipol dey laf and sing yeye song for.

¹⁵Na bitterness and sofa bi di food and drink wey God dey give mi.

¹⁶E don use my face rub groun kon break my tit with stone.

¹⁷I nor know wetin peace mean again and I don forget as happiness dey bi.

¹⁸Den I kry kon sey, “I nor get respet again! I don lost evritin wey I hope to get from God!”

¹⁹Wen ever I remember as I take sofa without house to sleep, e dey pain mi like poizin for my belle.

²⁰I nor go ever forget di time wen I take sofa; wen I bin dey mourn, bikos of evritin wey I lost.

²¹Anytime I remember all dis tins, I know sey I still get hope.

²²God faithful love nor dey end! And en mesi nor dey finish.

²³Wi dey always trust Yu bikos na evriday Yu dey show us yor goodness.

²⁴I tell mysef sey, “Na only God I get, so I go trust only en.”

²⁵God dey good to pipol wey trust and dey find am.

²⁶So e betta make wi sidan kwayet kon wait until God go kom save us.

²⁷And na naw wey wi still dey yong, wi suppose learn how to get patient as wi dey wait for God.

²⁸Make wi sidan kwayet wen God dey deal with us.

²⁹Make wi bow face groun, may bi na den God go give us hope again.

³⁰Pesin wey dem slap for one side, make e turn di oda side. Make e nor tok wen en enemies dey curse am.

³¹Bikos God nor go forget us forever.

³²Even doh sey E dey make us sofa naw, E still dey sorry for us, bikos en great love for us nor dey end.

³³God nor like to sofa pipol or make dem kry.

³⁴So to dey opress pipol for dis world,

³⁵to shit pipol kon kollect wetin bi dia own, God wey dey heaven dey si evritin

³⁶and E know dey happy wen dem nor give pesin korrect judgement for kourt.

³⁷So, na who fit tok make sometin happen, if God nor allow am?

³⁸Nor bi from God mout evritin from kom? Both good and bad?

³⁹Den, why wi human being go dey komplain if dem ponish us for awa sins?

⁴⁰Instead, make wi shek and test di tins wey wi dey do kon turn from sin kom meet God.

⁴¹Make wi lift awa hand and heart to God for heaven kon sey,

⁴²“Wi don sin and go against Yu and na dis make Yu dey vex for us.

⁴³Yu don hide yorsef bikos Yu dey vex and Yu porshu us komot for yor front. Yu nor even pity for us wen Yu dey kill us.

⁴⁴Yu hide yorsef for di kloud, so dat awa prayers nor go rish where Yu dey.

⁴⁵Yu don make us bi like dirty rag for all di oda nashons front.

⁴⁶All awa enemies dey tok bad against us.

⁴⁷Wi dey fear, bikos wi dey trap; wi don konfuse and distroy awasef.

⁴⁸Wota dey rush kom out from my eye, bikos dem don distroy my pipol finish.

⁴⁹I still dey kry well-well and I nor go stop at-all

⁵⁰until God go look from heaven kon si wetin don happen.

⁵¹My heart heavy well-well wen I si wetin happen to di wimen for dis town.

⁵²Pipol wey I nor do bad to, set trap for mi like sey I bi bird.

⁵³Dem trow mi inside one pit kon dey drop stone for my head.

⁵⁴Dem dey pour wota put for my head and I tink sey na die I dey.

⁵⁵But from inside di deep pit, I kon koll Yu wey bi my Oga God.

⁵⁶Yu hear my kry for help wen I sey: ‘God make Yu listin to mi well-well!’

⁵⁷Yes! Wen I koll Yu, Yu kom tell mi sey, ‘Nor fear.’

⁵⁸Oga God, na Yu bi my lawyer, so make Yu judge my kase, bikos Yu don save my life.

⁵⁹Yu don si di bad-bad tins wey dem do mi. So my God, make Yu judge my kase, so dat pipol go know sey I dey rite.

⁶⁰Yu don si all dia plans to revensh mi.

⁶¹Yu don hear all di wiked names wey dem dey koll mi and Yu know all di plans wey dem don make.

⁶²Evriday, my enemies dey tok as dem dey plan against mi.

⁶³Si dem! Weda dem sidan or stand, na mi dem dey laf and take dey sing.

⁶⁴So Oga God, make Yu pay dem back for all di bad tins wey dem don do.

⁶⁵Make Yu give dem sturbon and strong heart, so dat yor curse go dey dia head.

⁶⁶So as Yu dey vex, make Yu porshu and distroy dem komot dis world.”