Job 33— pcm

¹“Job, make yu listin and hear evritin wey I won tok!

²Si naw, I don open my mout and my tongue won start to tok.

³All my words na true and na true I go tok.

⁴Na God Spirit make mi and na en breath give mi life.

⁵Make yu ansa mi if yu fit. Make yu dey ready and prepare yor kweshons.

⁶Na di same tin mi and yu bi for God eye, na san dem take make mi and yu.

⁷So yu nor get rizin to fear mi and I nor go wahala yu too mush.

⁸“Naw, dis na wetin I hear wen yu dey tok:

⁹‘I nor dey guilty; I neva do any bad tin or kommit sin.

¹⁰But God dey find rizin make E for dey ponish mi like sey I bi en enemy.

¹¹E tie my leg with shain; E dey si evriwhere wey I waka go.’

¹²But I won tell yu sey yu dey wrong, bikos God big pass evribody.

¹³Why yu dey akuiz God sey E nor dey ever ansa yor komplain?

¹⁴“Even as God dey tok evritime, nobody won wait listin to wetin E dey tok.

¹⁵For nite wey pipol dey sleep, God dey tok to dem for vishon or thru dreams.

¹⁶Wen E make dem listin to wetin E dey tok, dem go dey fear for di warnin wey E dey give dem.

¹⁷God dey tok so dat dem go stop to sin kon honbol demsef, make E for fit save dem.

¹⁸E nor go let dem distroy demsef; E go save dem from deat.

¹⁹God dey send sickness to take korrect some pipol and dem go take korreshon wen dia body dey feel di pain.

²⁰Pipol wey dey sick nor fit even chop di food wey sweet well-well.

²¹Dia body dey die go and yu nor go fit si dia bones again.

²²Dem go soon go join dead body. Deat angel dey wait for dem.

²³May bi one angel go help am; one out of di tazon angels wey God get wey go tell am wetin dey rite.

²⁴Bikos God don forgi-am, di angel go sey, ‘Release am! E nor go fit go join dead body. Si wetin dem take replace en sin, so e don dey free.’

²⁵En body go kom yong and strong again like small pikin own.

²⁶Den wen e pray, God go ansa am. E go woship God with happiness. God go make am dey raitious for en eye again.

²⁷Di pesin go sing give odas sey, ‘I sin kon do wetin dey bad, but God nor ponish mi as e suppose to bi.’

²⁸E don save mi from deat and I still dey alive.

²⁹“True-true, God dey always do like dis, many-many times with pipol.

³⁰E dey save pesin life from deat and make am enjoy life again.

³¹So Job, make yu listin to wetin I dey tok. Naw, kwayet make yu let mi tok.

³²But if yu get wetin yu won tok, tok and I go tell yu if yu dey rite.

³³But if yu nor get, make yu kwayet listin to mi and I go tish yu wisdom.”