1Dis message na about Tyre pipol. Una wey dey drive ship, make una kry with pain. Dem don skata una house and dem tell una di news as una ship dey kom from Cyprus.
2Make una kry! Una wey dey stay near river and una wey bi tradas for Sidon, men wey dey travel round sea,
3go sell food wey dem harvest for Egypt and dey do business with pipol for oda kountry.
4Sidon pipol, make shame katch una, bikos sea and ocean don rijet una kon dey sey, “Wi neva feel pain like woman wey won born or sey wi don born pikin before; wi neva even train shidren before.”
5Even Egypt pipol go sopraiz well-well wen dem hear evritin wey happen for Tyre.
6So, Foenicia pipol wey dey stay near di sea, make una kry well-well! Make una run go Tarshish!
7Una sure sey dis na Tyre, di town where dem for dey celebrate since? Town wey God kreate, wey en pipol dey difren place for di world?
8Who bring all dis wahala kom Tyre wey en pipol na prince and wey pipol dey respet dia tradas well-well for di world?
9Na God wey dey lead heaven sojas do am. E do am to stop dia pride and to ponish dia pipol wey oda pipol dey respet.
10Una wey dey Tarshish, make una travel go back to una land, just as pesin dey cross River Nile, bikos Tyre don skata.
11God stresh en hand go di sea kon konker kingdoms, den kommand make dem distroy all di strong town for Kanaan.
12God sey, “Sidon town, una joy don end and dem go opress una. Even if una run go Cyprus, una nor go dey save for der.”
13Make una si Kaldean town, pipol wey nor know where dem from kom! Assyria pipol don turn di land to where wild animals dey stay. Dem don skata dia towas, distroy dia strong town kon turn am to where dem dey trow dirty put.
14So, una wey dey drive big ship, make una kry well-well, bikos dem don distroy di town where una for bin dey save.
15For dat time, dem go forget Tyre for seventy years, wey bi di normal years wey king suppose stay for dis world. Wen dat time don pass, pipol go know Tyre again and e go bi like di ashawo wey dey dis song:
16“Make una take di harp kon go round di town, una wey bi ashawo wey dem don forget! Make una play and sing una song, so dat men go kom meet una again.”
17Wen di seventy years don pass, God go make Tyre strong again. Di town go kon rish and go dey sell tins give all di oda kingdoms.
18Di profit wey dem go make, dem go gi-am to God. Dem nor go keep di money or allow am many for one place, but dem go give di profit to pipol wey always dey stay God present and dis pipol go use am take buy enough food and fine-fine klot wey dem go wear.