1Morgonen etter reis Josva tidleg upp og tok ut frå Sittim med alle Israels-borni og kom til Jordan; der var dei eit bel fyrr dei gjekk yver.
2Og då tri dagar var lidne, gjekk tilsynsmennene gjenom lægret
3og tala soleis til folket: Når de ser paktkista åt Herren dykkar Gud, og Levi-prestane som ber henne, so skal de fara av stad og fylgja etter henne,
4so de kann vita kva leid de skal taka; for den vegen hev de ikkje fare fyrr. Men det lyt vera eit godt stykke millom dykk og paktkista, tvo tusund alner på lag; kom henne ikkje for nær!
5So sa Josva til folket: Helga dykk no! For i morgon vil Herren gjera underfulle ting imillom dykk.
6Og til prestane sa han: Tak paktkista og far fram fyre folket! So tok dei paktkista og gjekk fyre folket.
7Og Herren sa til Josva: I dag vil eg taka til og gjera deg stor framfor augo åt heile Israel, so dei skal sjå at eg er med deg, liksom eg var med Moses.
8Seg no du so til prestane som ber paktkista: Når de kjem heilt nedåt Jordan, skal de verta standande der, nedmed åi!
9Då sa Josva til Israels-borni: Kom og høyr ordi frå Herren dykkar Gud!
10Dette, sa Josva, skal de hava til merke på at den levande Gud er midt imillom dykk, og at han skal driva burt for dykk både kana'anitane og hetitane og hevitane og ferisitane og girgasitane og amoritane og jebusitane:
11Paktkista åt han som råder yver all jordi, skal fara fyre dykk ut i Jordan.
12Vel no ut tolv menner av Israels-ættene, ein for kvar ætt!
13Og når prestane som ber paktkista åt Herren som råder yver all jordi, når dei stend med føtene i Jordanvatnet, då skal Jordanvatnet - det som kjem ovantil - demmast upp, so det stend som ein vegg.
14So tok folket ut frå tjeldbuene sine og skulde ganga yver Jordan, og prestane som bar paktkista, gjekk fyre dei;
15og då desse same prestane som bar paktkista, var komne til Jordan og so vidt hadde duppa foten i elvevatnet - men Jordan var heile våren so stor at ho gjekk yver breddene alle stader -
16då stana det vatnet som kom ovantil, og stod som ein vegg langt burte, uppmed Adam, den byen som ligg jamsides med Sartan, og det som rann nedetter til Moavatnet - eller Saltsjøen - vart reint burte. So gjekk folket yver åi midt for Jeriko.
17Men prestane som bar paktkista åt Herren, vart standande på turre botnen midt i Jordan, medan alle israelitane gjekk turrskodde yver åi, til heile folket var kome vel yver.