Exodus 24— NO1938N

¹Og til Moses sa han: Stig upp til Herren, du og Aron og Nadab og Abihu og sytti av dei øvste i Israel, og de skal tilbeda medan de endå er langt undan.

²Men Moses åleine skal ganga fram til Herren, dei hine må ikkje ganga fram, og ålmugen må ikkje stiga med han upp.

³Då Moses kom og bar upp for folket alle Herrens bod og alle lovene, då svara heile folket med ein munn; Alle dei ordi som Herren hev tala, vil me halda oss etter.

⁴So skreiv Moses upp alle Herrens ord, og morgonen etter reis han upp i otta og bygde eit altar innunder fjellet og reiste tolv minnesteinar for dei tolv Israels-ættene.

⁵Sidan sende han ut nokre unge menner av Israels-borni, og dei bar fram brennoffer og slakta uksar og ofra takkoffer til Herren.

⁶Og Moses tok helvti av blodet og hadde i bollane; og den andre helvti skvette han på altaret.

⁷So tok han paktboki og las upp for folket, og dei sa: Alt det Herren hev sagt, vil me gjera og vera lydige.

⁸Då tok Moses blodet og skvette på folket og sa: Sjå, dette er blodet til den pakti som Herren gjer med dykk, og som er grunna på alle desse bodi.

⁹Sidan gjekk dei upp, Moses og Aron og Nadab og Abihu og sytti av dei øvste i Israel,

¹⁰og dei såg Israels Gud; under føtene hans var som eit golv av safirhellor, klåre som himmelen sjølv.

¹¹Og han lyfte ikkje handi mot dei utvalde av Israel; dei skoda Gud, og sidan åt dei og drakk.

¹²Og Herren sa til Moses: Kom upp til meg på fjellet og ver her eit bel, so skal eg gjeva deg steintavlor og lovi og bodet, som eg hev skrive upp til rettleiding for dei!

¹³Då gjekk Moses i veg med Josva, fylgjesveinen sin, og Moses steig upp på Gudsfjellet.

¹⁴Og til dei øvste i Israel sa han: Ver no her og bia på oss til me kjem attende! Her er Aron og Hur; dei skal vera hjå dykk. Er det nokon som hev ei sak, so kann han ganga til dei.

¹⁵So steig Moses upp på fjellet, og skyi sveipte seg tett ikring nuten.

¹⁶Herlegdomen åt Herrens heldt seg på Sinaifjellet, og skyi gøymde det i seks dagar. Den sjuande dagen ropa Herren på Moses utor skyi.

¹⁷Og herlegdom åt Herrens var å sjå til for augo åt Israels-borni som ein logande eld på fjelltinden.

¹⁸So gjekk Moses inn i skyi og steig upp på fjellet. Og Moses var på fjellet i fyrti dagar og fyrti næter.