Romans 6— 2006

¹Што, пак, да речеме? Ќе останеме ли во гревот, за да се наголеми бла­годатта? Никако!

²Ние, кои сме умреле за гревот, како да живееме во него уште?

³Зар не знаете дека сите оние што бевме крстени во Исус Христос, во Неговата смрт бевме крстени.

⁴И така, ние се погребавме со Него преку крштавањето во смртта, за да мо­жеме, како што Христос воскресна од мртвите преку славата на Отецот, и ние така да живееме нов живот.

⁵Зашто, ако сме сраснати со Него во еднаква смрт, ќе бидеме соучесници и во воскресението,

⁶знаејќи дека нашиот стар човек е распнат со Него, за да биде уништено гревовното тело, па да не бидеме веќе робови на гревот;

⁷бидејќи, кој е мртов, тој е ослободен од гревот.

⁸А ако сме умреле со Христос, веруваме дека со Него и ќе живееме,

⁹знаејќи дека Христос, откако вос­кресна од мртвите, не умира повеќе: смртта нема веќе власт над Него.

¹⁰Тоа што Тој умре, за гревот умре еднаш засекогаш, а животот што го жи­вее, за Бога го живее.

¹¹Па така и вие сметајте се мртви за гревот, а живи за Бога во Христос Исус, нашиот Господ.

¹²И гревот да не царува во вашето смртно тело, за да не им се покорувате на телесните наслади!

¹³Не препуштајте му ги на гревот ва­шите органи на телото како орудија на неправедноста, туку препуштете Му се на Бога како оние што оживеале од мртвите, и вашите органи на телото како орудија на праведноста.

¹⁴Гревот нема да господари над вас, зашто вие не сте под Законот, туку под благодатта.

¹⁵Па што? Да грешиме ли, бидејќи не сме под Законот, туку под благодатта? Тоа никако!

¹⁶Дали знаете дека, ако му се предавате некому како робови за послуш­ност, робови сте му на оној кому му се покорувате: или на гревот, кој води во смрт, или — на послушноста, која води кон праведност?

¹⁷Но, благодарејќи Му на Бога, вие, иако бевте робови на гревот, од сѐ срце се покоривте на оној образец на поука, на која ѝ се предадовте.

¹⁸И така ослободувајќи се од гревот, вие станавте робови на праведноста.

¹⁹Ви зборувам како човек, поради слабоста на вашата човечка природа. Како што ги препуштивте органите на вашето тело во телесна служба на не­чистотата и беззаконието за беззаконие, така и сега оставете ги деловите од ва­шето тело да ѝ робуваат на праведноста која води во светост.

²⁰Додека му бевте робови на гревот, бевте слободни од праведноста.

²¹А каков плод имавте тогаш? Дела, од кои сега се срамувате, бидејќи нив­ни­от крај е смртта.

²²Но сега, кога се ослободивте од гре­вот и Му станавте служители на Бога, имате плод кој води во светост, а крајот — животот вечен.

²³Зашто, платата, што ја дава гревот, е смрт, а подарокот од Бога е живот ве­чен во Христос Исус, нашиот Господ.