Romans 10— 2006

¹Браќа, желбата на моето срце и на мојата молитва кон Бога за Израел е за негово спасение.

²Јас им сведочам дека тие имаат рев­ност за Бога, но не според сознанието.

³Зашто, не знаејќи за Божјата пра­ведност и тежнеејќи да воспостават сво­ја сопствена праведност, тие не ѝ се подредија на Божјата праведност,

⁴бидејќи крајната цел на Законот е Христос, за да биде оправдан секој што во Него верува.

⁵Мојсеј пишува за праведноста на Законот: „Кој ќе го исполни, тој ќе биде преку него жив.“

⁶А праведноста од верата вели: „Да не речеш во срцето свое: Кој ќе се ис­ка­чи на небото?“, што значи да се симне Христос,

⁷или: „Кој ќе слезе во бездната?“, што значи да се изведе Христос од мртвите!

⁸А што вели таа? — „Блиску до тебе е словото, во твојата уста и во твоето ср­це“, односно словото на верата, што го проповедаме,

⁹зашто, ако со устата исповедаш дека Исус е Господ и во срцето свое поверуваш дека Бог Го воскресна од мртвите, ќе се спасиш;

¹⁰бидејќи со срцето се верува за оправдание, а со устата се исповеда за спасение.

¹¹А и Писмото вели: „Секој кој верува во Него, нема да се посрами.“

¹²Нема разлика меѓу Јудеец и Елин, зашто еден и ист е Господ на сите, богат за сите кои Го повикуваат.

¹³Бидејќи секој кој ќе го повика име­то Господово, ќе биде спасен.

¹⁴Но како да Го повикаат Оној во Ко­го не поверувале? Како, пак, да поверуваат во Оној за Кого не слушнале? А ка­ко да слушнат, ако нема кој да про­по­веда?

¹⁵И како да проповедаат, ако не бидат испратени, како што е напишано: „Кол­ку им се прекрасни нозете на оние, што благовестат мир, што го благовестат доброто.“

¹⁶Но Евангелието сите не го пос­лу­шаа. Зашто Исаија вели: „Господи, кој поверува во она што го проповедавме?“

¹⁷Затоа, верата доаѓа од слушањето на пораката, а пораката — од Божјото слово.

¹⁸Но велам: зар тие не слушнаа? На­против. „Гласот им се разнесе по целата земја, и зборовите нивни — до краиш­тата на вселената.“

¹⁹Пак велам: зар Израел не разбра? Најнапред Мојсеј кажа: „Јас ќе ве раздразнам до љубомора со оние кои не се народ; со неразумен народ ќе ве раз­гне­вам.“

²⁰А Исаија се осмели да каже: „Ме најдоа оние кои не Ме бараа, им се от­крив на оние, кои не прашаа за Мене.“

²¹За Израел, пак, вели: „Постојано ги подавав рацете Свои кон народ непослу­шен и бунтовен.“