Psalms 40— 2006

¹Трпеливо се надевав на Господ, и Тој се наклони над мене и ја чу мо­литвата моја,

²и ме изведе од длабината на јазот и од длабока тиња, па ги постави нозете мои на камен и ги зацврсти стапалата мои;

³а во устата моја вложи нова песна — похвала за нашиот Бог. Мнозина ќе видат, и страв ќе ги опфати и ќе се надеваат на Господ.

⁴Блажен е оној човек што верува во Господ и не се обраќа кон горделивите, кон оние што застрануваат по лажни богови.

⁵Многу чудесни дела си направил, Господи, Боже мој, многу мисли чудесни — кој може да се спореди со Тебе!? Почнав да ги објавувам и да зборувам за нив, но тие број немаат!

⁶Жртви и приноси Ти не бараш, но ушите ми ги отвори; сепаленица и жрт­ва за грев Ти не побара.

⁷Тогаш реков; еве, идам; во свитокот на книгата за мене е напишано;

⁸со задоволство ќе ја исполнам волјата Твоја, Боже мој; Твојот закон е во срцето мое.

⁹Ја објавив Твојата правда во големото собрание; не ѝ бранев на устата моја; Ти го знаеш тоа, Господи.

¹⁰Твојата правда не ја сокрив во срцето мое, ја објавив верноста Твоја и спа­сението Твое; и не ги затаив Твојата милост и Твојата верност од собранието.

¹¹Но, Господи, не отстранувај го милосрдието Твое од мене; Твојата ми­лост и Твојата верност нека ме пазат постојано,

¹²зашто зла безбројни ме опкру­жија; ме притиснаа беззаконијата мои, и не можев дури ни да гледам, — тие се по­веќе од влакната на главата моја; а и срцето мое ме остави.

¹³Благоволи, Господи, да ме изба­виш; Господи, побрзај ми на помош!

¹⁴Нека се засрамат и нека поцрвенат сите, кои бараат да ја погубат душата моја! Нека бидат вратени назад и нека бидат предадени на потсмев оние, кои ми сакаат зло.

¹⁵Нека се скаменат од срам оние, кои сакајќи да ми се наругаат велат: „Аха! Аха!“

¹⁶А нека се зарадуваат и нека се развеселат во Тебе сите, кои Те ба­раат, и оние што сакаат спасение од Тебе непрестајно нека зборуваат: велик е, велик — Господ!

¹⁷А јас сум сиромав и беден; но Гос­под се грижи за мене. Ти си помош­ник мој и заштитник мој, Боже мој, не задоцнувај.