Psalms 21— 2006

¹Господи, со Твојата сила се весели царот и за спасението од Тебе безмерно се радува!

²Ти му даде, она што срцето негово посака, и молбата на устата негова не ја отфрли,

³зашто Ти го пресретна со добри благослови, му стави на главата круна со скапоцени камења.

⁴Тој побара од Тебе живот, а Ти му даде долг живот во векови.

⁵Голема е славата негова поради по­мошта од Тебе; Ти го покри со чест и величие.

⁶Ти положи на него вечен бла­гослов, развеселувајќи го со радоста на лицето Твое,

⁷зашто царот се надева на Господ и поради милоста на Севишниот нема да потклекне.

⁸Раката Твоја ќе ги најде сите Твои непријатели, десницата Твоја ќе ги најде сите што Те мразат.

⁹Кога ќе се појавиш, ќе ги напра­виш како огнена печка; гневот Господ­ов ќе ги погуби, и оган ќе ги проголта.

¹⁰Ти ќе го уништиш плодот нивни од Земјата, и семето нивно — меѓу човеч­ките синови.

¹¹Ако смислат против Тебе зло и се договораат, — не ќе можат ништо да направат.

¹²Ти ќе ги натераш во бегство, а од Твоите лакови ќе пуштиш стрели во лицето нивно.

¹³Издигни се, Господи, со Твојата си­ла! Ние ќе ја воспеваме и ќе ја про­славуваме Твојата моќ.