Psalms 143— 2006

¹Господи, слушни ја молитвата мо­ја, чуј го молењето мое поради Твојата верност; услиши ме според Твојата праведност

²и не стапувај во суд со Твојот слуга, зашто пред Тебе нема да се оправда ниту еден од живите.

³Непријателот ја прогонува душата моја, го скршил животот мој дури до земјата, ме остави во темнина како оние кои се одамна умрени;

⁴опадна духот мој во мене, се скамени во мене срцето мое.

⁵Се сеќавам на дамнешните дни и размислувам за сите Твои дела, расудувам за делата на Твоите раце.

⁶Ги протегнав кон Тебе рацете мои, душата моја е жедна за Тебе како сува земја.

⁷Услиши ме, поскоро, Господи: духот мој премале; не одвраќај го лицето Свое од мене, за да не заприлегам на оние, што слегуваат во гроб.

⁸Соопшти ми ја рано милоста Твоја, зашто во Тебе се надевам, Господи. Покажи ми го, Господи, патот по кој да одам, зашто кон Тебе ја издигам душата своја.

⁹Избави ме, Господи, од моите непријатели, зашто кај Тебе прибегнав.

¹⁰Научи ме да ја исполнувам волјата Твоја, зашто Ти си мојот Бог. Твојот благ дух нека ме води по прав пат.

¹¹Заради Твоето име, Господи, зачу­вај ми го животот; поради Твоја­та праведност — избави ја од неволја душа­та моја.

¹²Според милоста Твоја истреби ги непријателите мои и погуби ги сите, кои ја измачуваат душата моја, зашто јас сум слуга Твој.