Psalms 118— 2006

¹Славете Го Господа, зашто Тој е до­бар, зашто милоста Негова е вечна.

²Нека каже сега домот Израелов дека милоста Негова е вечна.

³Нека рече сега домот Аронов дека милоста Негова е вечна.

⁴Нека кажат сега сите, кои се бојат од Господ: дека милоста Негова е вечна.

⁵Кога бев на мака, Го повикав Господа и Тој ме услиши и на ширина ме изведе.

⁶Господ е мој помошник, нема да се плашам: што може да ми направи човек?

⁷Господ ми е помошник: и јас побе­доносно ќе гледам на непријателите мои.

⁸Подобро е да се надевам во Гос­под, отколку да се надевам во човек.

⁹Подобро е да се надеваш во Гос­под, отколку да се надеваш во кнезови.

¹⁰Сите народи ме опколија, но со името Господово јас ги разбив;

¹¹ме опседнаа, ме обиколија, но со името Господово јас ги победив.

¹²Ме опкружија како пчели околу сотка, па се запалија како оган во трње: со името Господово јас им се против­ставив.

¹³Ме турнаа силно за да паднам, но Господ ми помогна.

¹⁴Господ е крепост моја и сила; Тој стана мое спасение.

¹⁵Глас на радост и на спасение се слу­ша во домовите на праведните; десницата на Господ дава сила!

¹⁶Десницата Господова ме возвишу­ва, десницата Господова дава сила.

¹⁷Нема да умрам, но ќе живеам и ќе ги разгласувам делата Господови.

¹⁸Господ строго ме казни, но на смрт не ме предаде.

¹⁹Отворете ми ја вратата на правдата: ќе влезам во неа, ќе Го прославувам Господа.

²⁰Ете, тоа е вратата Господова, пра­ведните влегуваат низ неа;

²¹ќе Те славам, зашто ме услиши и стана спасение мое.

²²Каменот што го отфрлија ѕидари­те, стана камен темелник.

²³Тоа е од Господ, и прекрасно е во очите наши.

²⁴Ова е денот што го создаде Гос­под за да се зарадуваме и да се развеселиме во него.

²⁵О, Господи, спаси нѐ! О, Господи, побрзај!

²⁶Нека е благословен оној, кој оди во името на Господ! Ве благословуваме од домот Господов.

²⁷Бог е Господ и Тој нѐ осветлува; образувајте празнична придружба до роговите на жртвеникот.

²⁸Бог мој си Ти и Тебе ќе Те сла­вам; Бог мој си Ти и Тебе ќе Те превознесувам.

²⁹Славете Го Господа, зашто Тој е до­бар, зашто милоста Му е вечна.