Proverbs 4— 2006

¹Слушајте ја, деца, татковата поука и внимавајте, та да се научите на разум,

²зашто добар дар ви дарувам; не оста­вајте ја мојата заповед.

³Зашто и јас бев сакан син на татко ми, и како единец омилен на мајка ми;

⁴и татко ми ме поучуваше и ми веле­ше: зборовите мои задржи ги во срцето твое; пази ги моите заповеди и не заборавај ги!

⁵Здобивај се со мудрост, придобивај разум; не заборавај го тоа и не отстра­нувај се од зборовите на устата моја.

⁶Не оставај ја, — и таа ќе те чува, сакај ја, — и таа ќе се грижи за тебе.

⁷Најважна е мудроста: придобивај мудрост и за сиот свој имот придобивај разумност.

⁸Високо цени ја, и таа ќе те воз­дигне; таа ќе те прослави, ако ја прегрнеш,

⁹ќе положи на главата твоја прекра­сен венец, со великолепна круна ќе те дари.

¹⁰Слушај, синко, и прими ги зборови­те мои, — и ќе ти се умножат годините на животот.

¹¹Ти го покажувам патот на муд­роста, те водам по прави патеки.

¹²Ако одиш, нозете твои нема да се сопнат, и ако потрчаш, нема да се измо­риш.

¹³Држи се здраво за поуката, не ос­тавај ја; пази ја, бидејќи таа е твојот живот.

¹⁴Не оди на пат безбожнички и не оди по патот на лоши луѓе;

¹⁵остави го, не оди по него, отстра­ни се од него и заобиколи го;

¹⁶зашто тие не заспиваат, ако не на­прават зло; и сон не ги фаќа, ако не до­ведат некого до пад;

¹⁷зашто тие јадат леб од беззаконие и пијат вино од грабеж.

¹⁸Патеката на праведните е како болскава светлина, која свети сѐ повеќе и повеќе, дури не настане ден.

¹⁹А патот на беззакониците е како темнина; тие не знаат, од што ќе се сопнат.

²⁰Синко, внимавај на зборовите мои и приближи го увото кон поуките мои;

²¹да не отстапуваат тие од твоите очи; чувај ги внатре во срцето свое:

²²зашто тие се живот за оној што ги нашол, и здравје за целото тело негово.

²³Од сѐ, што е за пазење, најмногу чувај го срцето свое, зашто од него се изворите на животот.

²⁴Отфрли ја од себе лажливоста на устата, и лукавството на јазикот од себе оддалечи го.

²⁵Очите твои нека гледаат право, и клепките твои да бидат управени право пред тебе.

²⁶Провери ја патеката со нозете свои, и сите патишта твои нека бидат цврсти.

²⁷Не скршнувај ни десно, ни лево; оддалечи ја ногата твоја од злото.