Proverbs 25— 2006

¹И ова се мудри изреки Соломонови, што ги собраа луѓето на јудејскиот цар Езекија.

²Слава за Бога е да ја обвива секоја работа со тајна, а слава за царевите е да ги истражуваат работите.

³Како небото во висините и земјата во длабочините, така и срцето на царевите е неиспитливо.

⁴Оддели ја смесата од среброто, и истата ќе биде работа на златарот;

⁵оддалечи го неправедниот од ца­рот, и престолот негов ќе се зацврсти со правда.

⁶Не се кревај на големо пред лицето на царот и не седнувај на местото на големците;

⁷зашто подобро е кога ќе ти кажат: „Дојди тука погоре“, отколку кога ќе те понизат пред очите на кнезот.

⁸Не брзај да покренуваш тужба, зашто, што ќе правиш на крајот, кога твојот противник ќе те посрами?

⁹Суди се со противникот, но туѓи тајни не откривај,

¹⁰за да не те прекори оној, што ќе го чуе тоа, и тогаш нечесноста твоја нема да избега од тебе.

¹¹Умесно кажаниот збор е како златно јаболко во сребрена кошничка.

¹²Мудриот разобличувач за внимателно уво е како златна обетка и украс од чисто злато.

¹³Како ладен снег во време на жетва, така е верен оној пратеник, што се испраќа: тој му донесува утеха за ду­шата на својот господар.

¹⁴Како облаците и ветровите без дожд, таков е човекот, кој се фали со лажливи подароци.

¹⁵Со долготрпеливост се придобива и судија, а мек јазик коски крши.

¹⁶Ако најдеш мед, јади колку што ти треба за да не се прејадеш и да не го повратиш.

¹⁷Не оди често во куќата на пријателот свој, за да не му додеваш и да не те намрази.

¹⁸Она што е чеканот, мечот и острата стрела, таков е човекот, кој сведочи лажно против ближниот свој.

¹⁹Она што е скршен заб и крива нога, таква е надежта на безна­дежниот во злочест ден.

²⁰Тоа што е оној, кој соблекува облека во студен ден, она што е оцет на ра­на, таков е оној, кој песни пее на ната­жено срце.

²¹Ако непријателот твој е гладен, нахрани го со леб; и ако е жеден, напој го со вода;

²²зашто, правејќи го тоа, ти нат­рупу­ваш жар врз главата негова, и Господ ќе ти воздаде.

²³Северниот ветер дожд донесува, а таен јазик — незадоволни лица.

²⁴Подобро да живееш во агол на по­к­ривот, отколку со жена кавгаџика во широка куќа.

²⁵Она што е студената вода за из­мачената од жед душа, тоа е добрата вест од далечна земја.

²⁶Она што е нечист извор и матен кладенец, тоа е праведниот кој по­пушта пред безбожниот.

²⁷Како што не е добро да се јаде многу мед, така и да се лакомиш за слава.

²⁸Она што е разрушен град, без ѕи­дови, таков е човекот, кој не владее со духот свој.