Proverbs 22— 2006

¹Подобро е добро име, отколку големо богатство, и подобро е бла­гонаклоност, отколку сребро и злато.

²Богатиот и сиромавиот се сре­ќаваат еден со друг; и едниот и другиот ги создал Господ.

³Умниот го гледа злото и го избегнува; а безумните одат невнимателно и тоа скапо го плаќаат.

⁴Плодови на смиреноста се: стравот Господов, богатството, славата и животот.

⁵По патот на подмолниот — трње и стапици: кој ја пази душата своја, ќе бега од нив.

⁶Поучи го момчето во почетокот на патот негов: тој нема да скршне од него и кога ќе остари.

⁷Богатиот господари над сиромавиот, и должникот станува роб на заемодавецот.

⁸Кој сее неправда, ќе пожнее зло, и прачката на гневот негов ќе исчезне.

⁹Милосрдниот ќе биде благословен, зашто им дава на бедните од лебот свој.

¹⁰Истерај го исмејувачот, и раздорот ќе исчезне, ќе престанат кавгата и на­в­редите.

¹¹Оној што љуби чисто срце, и чии зборови се пријатни, и на царот станува пријател.

¹²Очите на Господ го чуваат знае­њето, а зборовите на престапникот Тој ги разобличува.

¹³Мрзливиот вели: „Лав има надвор! Насред улица ќе загинам!“

¹⁴Устите на блудниците се длабока бездна: на кого Господ ќе се разгневи, тој ќе падне во неа.

¹⁵Безумието на детето му е при­врзано за срцето, но прачката ќе го отстрани далеку од него.

¹⁶Кој ограбува сиромав, за да го ум­ножи богатството свое, и кој му дава на богатиот, — ќе осиромаши.

¹⁷Наклони го увото и слушај ги збо­ровите на мудрите, и сврти го срцето кон моите зборови,

¹⁸зашто ќе се радуваш, ако ги пазиш во срцето свое, и ако ти бидат исто така во устата твоја.

¹⁹За да биде твојата надеж во Гос­под, јас ти го покажувам патот.

²⁰Јас ти напишав триесетина совети и поуки,

²¹за да те поучам на зборовите вистински и добри, та да ги предаваш на оние што те испраќаат.

²²Не ограбувај сиромав, зашто тој е сиромав, и не притеснувај страдалник кај портите, —

²³зашто Господ ќе се застапи за нив, и ќе ја истргне душата на грабачите нивни.

²⁴Не се дружи со гневлив и не оди со човек жесток,

²⁵за да не се навикнеш на нивните патишта и да не навлечеш стапица на душата своја.

²⁶Не биди од оние, што даваат рака и се заложуваат за туѓи долгови:

²⁷ако нема со што да платиш, зошто да ти ја земат постелата под тебе?

²⁸Не преместувај стари меѓи, кои твоите татковци ги поставиле.

²⁹Си видел ли вешт и искусен човек во својата работа? Тој ќе служи на цареви, нема да остане меѓу простите.