Proverbs 17— 2006

¹Подобро сув залак и со него мир, отколку куќа полна со заклан добиток, но во раздор.

²Разумен слуга господари над раз­вратен и со браќата ќе го подели нас­ледството.

³Среброто и златото со оган се испи­туваат, а срцата Господ самиот ги испитува.

⁴Лош човек се вслушува во беззакона уста; а лажливец — во злонамерен јазик.

⁵Кој се подбива со сиромав, Созда­телот негов го навредува; кој се радува на зло, нема да остане неказнет.

⁶Синовите на синовите се венец на старите, а слава за децата се родите­лите нивни.

⁷На безумниот умен збор не му прилега, уште повеќе на големец — лажлива уста.

⁸Дарот е скапоцен камен во очите на оној што го дава: каде и да се сврти, ќе успее.

⁹Кој ги покрива престапите, бара љубов, а кој одново напомнува за нив, оддалечува дури и пријател.

¹⁰Врз разумниот посилно дејствува прекор, отколку врз глупавиот сто уда­ри со стап.

¹¹Лошиот човек бара само зло, затоа жесток ангел ќе биде испратен против него.

¹²Подобро човек да сретне мечка, чии мечиња се грабнати, отколку безумен во неговото безумство.

¹³Кој враќа зло за добро, злото нема да ја напушти куќата негова.

¹⁴Почеток на караницата е како кога водна брана се отвора: отстапи од кара­ницата пред да се разгори.

¹⁵Кој оправдува грешен и кој обвинува праведен — и обајцата се одвратност пред Господ.

¹⁶Што ќе му се пари во рацете на без­умен за да купи мудрост, кога во него нема разум?!

¹⁷Пријателот сака во секое време и како брат ќе се јави во време на не­волја.

¹⁸Неразумен човек подава рака и станува гарант за ближниот свој.

¹⁹Кој сака караници, го сака гревот, и кој високо ја издига вратата своја, бара да падне.

²⁰Подмолно срце нема да најде добро, и лукав јазик ќе западне во беда.

²¹Кому се родил глупак, тешко нему. За таткото на безумен нема радост.

²²Веселото срце е благотворно како лек, а паднатиот дух коски суши.

²³Не се прави патиштата на нечесни­те што земаат поткуп; тие го искривуваат патот на правосудието.

²⁴Мудроста е пред лицето на разумниот, а очите на безумниот се на крајот од земјата.

²⁵Глупав син е мака за таткото и огорчување за мајката.

²⁶Не е добро да казнуваш праведен, ниту да тепаш началник.

²⁷Разумниот е воздржан во зборо­вите свои, а одмерениот е трпелив и спокоен.

²⁸И безумниот кога молчи, за мудар го сметаат, и кој ја затвора устата своја — за разумен го сметаат.