Numbers 29
1 „Во седмиот месец, во првиот ден од месецот, треба да има свето собрание; никаква работа не вршете; тоа да ви биде Ден на трубни знаци;
2 и принесувајте сепаленица за благопријатен мирис на Господ: еден јунец, еден овен, седум едногодишни машки јагниња, без надостаток;
3 а заедно со нив и лебен принос од пченично брашно, измешано со масло, три десетини од ефа за јунецот, две десетини од ефа за овенот,
4 и една десетина од ефа за секое од седумте јагниња,
5 и еден козел како жртва за грев, за да се ослободите од гревот.
6 Тоа да го додавате кон новомесечните сепаленици и лебните приноси за нив, и преливите нивни, и секојдневните сепаленици со нивните приноси и преливи, според наредбите, како благопријатен мирис за Господ.
7 И во десеттиот ден од тој седми месец треба да имате свето собрание: смирувајте ги душите свои и никаква работа не вршете;
8 и принесувајте сепаленици за благопријатен мирис на Господ: еден јунец, еден овен, седум едногодишни машки јагниња; тие треба да бидат без недостаток;
9 и заедно со нив и лебен принос од пченично брашно, помешано со масло три десетини од ефа за јунец, две десетини од ефа за овен,
10 и по една десетина од ефа за секое од седумте јагниња,
11 како и еден козел — жртва за грев, освен жртвите за грев што се принесуваат во Денот на очистувањето, и освен постојаните сепаленици и лебните приноси со нив и преливите за нив.
12 И во петнаесеттиот ден од седмиот месец треба да ви биде особено свет, никаква работа не вршете и празнувајте го тој празник Господов седум дена:
13 и принесувајте сепаленица, жртва за благопријатен мирис на Господ: тринаесет јунци, два овна, и четиринаесет едногодишни машки јагниња; тие треба да бидат без недостаток;
14 и кон нив лебен принос од пченично брашно, измешано со масло, три десетини од ефа за секое од тринаесетте јунци, две десетини од ефа за секој овен,
15 и по една десетина од ефа за секое од четиринаесетте јагниња,
16 и еден козел — жртва за грев, освен секојдневната сепаленица со нејзиниот лебен принос, како и преливот за неа.
17 А на вториот ден принесувајте: дванаесет јунци, два овна и четиринаесет едногодишни машки јагниња, без недостаток,
18 и со нив уште лебен принос и прелив за јунците, овните и јагнињата, според бројот нивни, според наредбите;
19 исто така и еден козел — жртва за грев, покрај постојаната сепаленица со приносот и преливот за неа.
20 На третиот ден, пак, принесувајте: единаесет јунци, два овна, четиринаесет едногодишни машки јагниња, без недостаток,
21 и со нив лебен принос и прелив за јунците, овните и јагнињата, според бројот нивни, според прописите;
22 исто така и еден козел — жртва за грев, покрај постојаната сепаленица со приносот и преливот за неа.
23 На четвртиот ден принесувајте: десет јунци, два овна, четиринаесет едногодишни машки јагниња, без недостаток,
24 со нив и лебен принос и прелив за јунците, овните и јагнињата, според бројот нивни, според наредбите,
25 и покрај тоа и еден козел — жртва за грев, освен постојаната сепаленица и приносот и преливот за неа.
26 И на петтиот ден принесувајте жртва: девет јунци, два овна, четиринаесет едногодишни машки јагниња, без недостаток,
27 и со нив принесете уште и лебен принос и прелив за јунците, овните и јагнињата, според бројот нивни, според наредбите,
28 и еден козел — жртва за грев, покрај постојаната сепаленица и приносот и преливот за неа.
29 На шестиот ден, пак, принесувајте: осум јунци, два овна, четиринаесет едногодишни машки јагниња, без недостаток,
30 а со нив и лебен принос и прелив за јунците, овните и јагнињата, според бројот нивни, според наредбите;
31 а исто така и еден козел — жртва за грев, покрај постојаната сепаленица со приносот и преливот за неа.
32 Во седмиот ден принесувајте: седум јунци, два овна, четиринаесет едногодишни машки јагниња, без недостаток,
33 и со нив принос и прелив за јунците, овните и јагнињата, според бројот нивни, според наредбите,
34 а и еден козел како жртва за грев, освен постојаната сепаленица со приносот како и преливот за неа.
35 Во осмиот ден е крај на празникот: никаква работа не вршете;
36 и принесувајте сепаленица, жртва со пријатен мирис на Господ: еден јунец, еден овен, седум едногодишни машки јагниња без недостаток,
37 и заедно со нив лебен принос и прелив за јунецот, за овенот и за јагнињата, според бројот нивни според прописите;
38 освен тоа уште и еден козел — жртва за грев, покрај постојаната сепаленица, приносот и преливот за неа.
39 Принесувајте го тоа на Господ на вашите празници, покрај оние што ги принесувате поради завет или поради грижа и покрај сепалениците ваши, и лебните приноси и жртвите за мир.“