Numbers 17
1 И му рече Господ на Мојсеј, велејќи:
2 „Кажи му на Елеазар, синот на свештеникот Арон, да ги собере кадилниците на изгорените и огнот да го исфрли, бидејќи тие се осветија,
3 кадилниците на овие грешници поради нивната смрт, да се сплескаат на листови за оковување на жртвеникот, зашто тие ги донесоа пред лицето Господово, и затоа се осветија; и тие ќе бидат опомена за синовите на Израел.“
4 Тогаш свештеникот Елеазар, ги зеде бакарните кадилници што ги беа донеле изгорените, и ги сплескаа на листови за оковување на жртвеникот,
5 за да помнат синовите израелски, па никој надворешен, кој не е од Ароновото семе, да не принесува темјан пред Господ, за да не стане и со него она што стана со Кореј и соучесниците негови, како што му беше рекол Господ преку Мојсеј.
6 На вториот ден целото општество на синовите израелски се побуни против Мојсеј и Арон и рече: „Вие го уништивте народот Господов.“
7 И кога се собра народот, за да ги нападне Мојсеј и Арон, тие се свртеа кон скинијата на собранието, и ете, ја покри облак и славата Господова се јави.
8 И се приближија Мојсеј и Арон кон скинијата на собранието.
9 И му рече Господ на Мојсеј, велејќи:
10 „Отстранете се од тие луѓе и Јас во еден миг ќе ги погубам!“ Но тие паднаа на колена.
11 И му рече Мојсеј на Арон: „Земи ја кадилницата, стави во неа оган од жртвеникот, сипи темјан и носи го тоа што побрзо кај народот и помоли се за нив, зашто гнев излезе од лицето на Господ, и почна да ги погубува луѓето.“
12 И направи Арон, како што рече Мојсеј, и се најде кај народот, и ете веќе почна помор меѓу народот. И тој исипа темјан и се помоли за народот:
13 застана меѓу мртвите и живите, и поморот престана.
14 Изумреа од поморот четиринаесет илјади и седумстотини души, освен умрените по делото на Кореј.
15 Тогаш Арон се врати кај Мојсеј, при влезот од скинијата на собранието, откако престана поморот.
16 И му рече Господ на Мојсеј, велејќи:
17 „Кажи им на синовите израелски и земи од нив по еден жезол од колено, по еден жезол од секој нивни кнез, дванаесет жезла, и името на секој напиши го на жезолот;
18 Ароновото име напиши го на Левиевиот жезол, зашто тие треба да дадат еден жезол, според племето на нивниот род,
19 и стави ги во скинијата на собранието, пред ковчегот на заветот, каде што ви се јавувам;
20 и кого Јас ќе го одберам, неговиот жезол ќе расцути; и така ќе го отстранам незадоволството на синовите израелски што го креваат против вас.“
21 И им рече Мојсеј на синовите на Израел, и сите началници нивни им дадоа, од секој началник по еден жезол, дванаесет жезла, според кнежествата свои и родовите нивни; и Ароновиот жезол беше меѓу жезлата нивни.
22 Тогаш Мојсеј ги постави жезлата пред лицето Господово во скинијата на собранието.
23 На вториот ден влезе Мојсеј во скинијата на собранието, и ете, Ароновиот жезол, од Левиевиот дом, беше напупил, расцветал и родил бадеми.
24 И ги изнесе Мојсеј сите жезла од лицето Господово пред сите синови на Израел; и тие го видоа тоа и секој си го зеде својот жезол.
25 И му рече Господ на Мојсеј: „Постави го пак Ароновиот жезол пред ковчегот на заветот да се чува, како опомена за непокорните, па ропотот против Мене да престане и тие да не умираат.“
26 И Мојсеј го направи тоа; како што му заповеда Господ, така направи.
27 И му рекоа синовите израелски на Мојсеј: „Ете, ние умираме, гинеме, сите ќе изумреме;
28 секој, кој се приближува кон скинијата Господова, умира: дали ќе изумреме така сите?“