Micah 1
1 Слово Господово, упатено до Михеј од Морешет, во деновите на Јотам, Ахаз и Езекија, цареви јудејски, со кое му беше откриено за Самарија и за Ерусалим.
2 Чујте, сите народи, внимавај, земјо, и сѐ што те исполнува! Сведок нека е против вас Господ Бог, Господ од Својот свет храм!
3 Зашто Господ, ете, излегува од Своето место, ќе слезе и ќе оди по земните височини,
4 и планините ќе се топат под Него, долините ќе се растопат како восок од оган, како водата што се излева низ стрмнини.
5 И сето тоа ќе стане поради престапите на Јаков, поради гревот на Израеловиот дом. Кој му е гревот на Јаков? Нели е тоа Самарија? Кои ѝ се идолските светилишта на Јудеја? Нели е тоа Ерусалим?
6 Затоа од Самарија ќе направам купишта урнатини во полето, место за садење лози; ќе ги сринам камењата нејзини во долина и ќе ѝ ги разголам основите.
7 И сите нејзини резани ликови ќе се строшат и сите нивни дарови од блуд — со оган ќе бидат изгорени: сите идоли ќе ги разурнам; со дарови од блуд ги правела, и пак ќе бидат дарови од блуд.
8 Поради тоа ќе заплачам и ќе заридам, ќе одам бос и гол, ќе вијам како чакал, ќе врискам како ној;
9 зашто нема лек за нејзината рана, тоа дојде до Јудеја, а стигна дури и до портите на Мојот народ — сѐ до Ерусалим.
10 Не разгласувајте го ова во Гет, не плачете таму гласно, а во Бет-Леафра посипете се со пепел.
11 Исели се, жителко шафирска, срамно разголена; нема да се спаси ни жителката хананска, до темел е разурнат Бет-Ецел, искорнат е од своите цврсти основи.
12 Жителката на Марот е желна за добро, а ете, зло дојде од Господ, слезе до портите ерусалимски.
13 Впрегни брзи коњи во колата, жителко лахишка, тоа беше почеток на гревот од ќерката Сионска, зашто во тебе се појавија престапите на Израел.
14 Затоа ти ќе се збогуваш со дарови од Морешет-Гат; куќите ахзивски ќе бидат измама за царевите израелски.
15 Ќе доведам и освојувач против тебе, жителко; и тој ќе дојде дури до Адулам, славата на Израел.
16 Куби ја косата своја, истрижи се — од жал за своите сакани деца: разголи ја ќелавоста своја за нив како гологлав орел зашто тие ќе бидат одведени од тебе во ропство.